Amerıkalyq Sardar Tarazdaǵy ata-anasy Mahanovtardy izdeıdi

Amerıkalyq otbasy asyrap alǵan tarazdyq Sardar Beknuruly 3 jyldan beri týǵan ata-anasyn izdep júr. 1999 jyly týǵan Sardardy bir jyldan keıin amerıkalyq otbasy  Brıýs pen Sıýzan asyrap alyp, Iýta shtatyna kóshedi. Olar Taraz qalasynan tek Sardardy ǵana emes taǵy da 2 qyzdy asyrap alǵan. Qazir Sardardyń 9 baýyry bar. Asyrap alǵan ata-ana onyń atyn ózgertpegen. Tegi ózgeriske ushyraǵan Sardar endi shyqqan tegin bilsem, ata-anasyn tanysam deıdi. 

Qamshy.kz aqparat agenttiginiń tilshisi Pol Sardar Bapkokpen sóılesip, qazirgi otbasy, Qazaqstanǵa sapary jáne ata-anasyn izdeýge ne sebep bolǵanyn surap kórdi. 

Sardar qazirgi otbasyń týraly,  óziń týraly aıtyp berseń? 

Meniń 9 baýyrym bar. Meni tárbıelep, ósirgen ata-anam – amerıkalyq. Ákemniń aty Brıýs, anamnyń aty Sıýzan. Meni óte jaqsy otbasy asyrap aldy. Olar 5 balany dúnıege ákelse de, taǵy 5 bala asyrap alǵan. 2 ápkem – qazaqstandyq, 2 aǵam – Taıvanda týǵan.

Qazir Iýta shtatyndaǵy ýnıversıtette halyqaralyq qatynastar men saıası ǵylym mamandyǵy boıynsha bilim alyp jatyrmyn. Sport pen mýzykaǵa qatty qyzyǵamyn. Voleıbol men basketbol oınaımyn. Sondaı-aq pıanıno, baraban, skrıpkada oınaı alamyn. 

Amerıkalyq otbasyńnyń asyrap alǵanyn qashan bildiń?

Bul týraly kishkentaı kezimde bildim. Sebebi ata-anam barlyq jaǵdaıdy erte jastan túsindirip, aıtyp berdi. Árıne ózimniń túr-sıpatym amerıkalyqtarǵa uqsamaıtyn. Sol sebepti shyndyqty erte me kesh pe biletin edim. Shamamen 3-4 jasymda amerıkalyq otbasymnyń asyrap alǵanyn bildim. 

Bıologııalyq ata-anańdy izdeýińe ne sebep boldy? Amerıkadaǵy qazirgi ata-anań qalaı qabyldady? Qarsy bolmady ma?

Men sekildi asyrandy balalar óziniń tegi týraly kóp oılanady. Qaıda dúnıege keldim, ata-anam kim degen sekildi suraqtar únemi mazalaıdy. Osyndaı jaýapsyz suraqtar maǵan motıvasııa boldy. Meni tárbıelep, ósirgen qazirgi ata-anam da keremet jandar. Alaıda men úshin jumbaq bolyp qalǵan ózimniń bir bólshegimdi, ıaǵnı, ata-anamdy kórgim, tanysqym keledi. Týǵan ata-anamdy tapqanda ǵana ózimniń kim ekenimdi az da bolsa túsinip, ómirime mán kiretin sekildi. Árıne, amerıkalyq otbasym meni tolyqtaı qoldady. Olar maǵan "Sen qazaqtyń qusysyń. Ushyp kelgen jeriń týraly bilýge quqylysyń. Biz qoldan kelgenshe kómektesemiz", dedi. 

2020 jyldan bastap ata-anamdy izdep júrmin. Qazirgi áke-sheshem týý týraly kýáligimdi, asyrap alǵany jóninde qujattardy berdi. О́zime qatysty barlyq qujattardy qarap shyqtym. Qujattardy qazaqstandyq jýrnalısterge, maǵan kómekteskisi kelgen uıymdarǵa kórsettim. 

Týǵan anamnyń esimi Baımahanova Elmıra Qalmahanbetqyzy, al ákemniń aty-jóni Baımahanov Beknur. Olardy tabamyn dep úmittenemin. Týǵan áke-sheshemmen tanysyp, óz oqıǵamdy tolyq bilgim keledi. Olardy túsingim keledi. 

Eger ata-anań tabylsa Qazaqstanǵa kóship kelý oıyńda bar ma? 

Qazaqstandaǵy otbasymmen qaýyshsam, kóship kelip, ómir boıy Qazaqstanda turamyn dep aıta almaımyn. Kóp nárseni úırengim, bilgim keledi. Mádenıetimen tanysqym keledi. Árıne, Qazaqstanda ómir súrsem de keremet bolar edi. Ázirge, ol jaǵyn oılamadym...

Qazaqstanǵa ata-anańdy izdeý úshin kelipsiń.  Qandaı sezimde boldyń? Qazaqsha úırený oıyńda bar ma?

Iá, mamyr aıynda 3 aptadaı Qazaqstanda boldym. Bul men úshin ǵajap sapar boldy. Kóp tájirıbe jınadym. Ushaq qonǵannan keıin aeroporttan qazaqtardy kórdim. Bul qandaı sezim ekenin bilesiń be? Amerıkada qazaqtar az bolǵan soń mundaı sezimdi bastan ótkermedim. Sebebi ózime uqsas adamdar az boldy. Bul sezimdi sózben jetkizý múmkin emes. Ǵajap! Qalalardy aralap, serýendegen qatty unady. Almaty, Taraz, Pavlodar jáne Astana qalasyna bardym. Túrli taǵamdardyń dámin tatyp kórdim. Qazaqstan týraly kóp málimet bildim. 

Qazaqstanǵa ýaqytsha kóship, qazaq tilinde erkin sóıleýdi úırengim keledi. Jańa til úırengenge qumarmyn. Qazaq tilinde erkin sóılep ketsem, jaqsy bolar edi.