"Muny ádeıi jasap otyr": Sanjar Boqaev bıliktiń saılaýdy ne úshin ótkizgenin aıtty

Keshe Májilis depýtattarynyń ant berý rásimi ótti. Májilis jıynynan keıin saılaýda jeńilis tapqan Sanjar Boqaev Muhtar Taıjannyń Youtube arnasyna suhbat berip, bıliktiń saılaý ótkizýdegi motıvi men jeńgen depýtattar jaıly pikirin bildirdi.  

"Olar – shynaıy saılanǵan emes, taǵaıyndalǵan depýtattar. Joǵarydan túsetin tezısterdi ǵana kútip otyratyndyqtan, olardyń óz pikirin aıtýǵa murshasy da, quqy da joq sııaqty bolyp qaldy" – dedi ol.

Sonymen qatar Sanjar Boqaev saılaýdy ótkizbeı-aq qoıý keregin aıtty.  

"15–20 adam aýysqannan maǵyna ózgermedi. Saılaýdy ótkizbeı–aq, burynǵy depýtattardy qaldyra salý kerek edi. Al biz bolsaq respýblıkalyq bıýdjetten 25 mlrd teńgeni shashyp tastadyq. Nátıjesinde halyq qalaǵan kandıdattaryn depýtat ete almady, táýelsiz májilis qurylmady" – dep málimdedi ol.

Sanjar Boqaev saılaý nátıjesin saralaı kele, bıliktiń ózine senimsizdik týdyryp, halyq "Jańa Qazaqstannyń" ótirik ekenin túsine bastaǵanyn habarlady. Sondaı–aq ótken saılaýǵa halyqtyń renjıtin jóni bar ekenin aıtyp, mundaı jınalyp qalǵan renishterdiń túbi syrtqa shyǵatynyn aıtty. 

"Zańǵa qaraǵan eshkim joq, bári oıyna kelgenin istedi. Muny bılik ádeıi jasap otyrǵanyn baıqadym. Bılikke saıası mádenıeti joǵary qoǵam qajet emes. "Saılaý ınstıtýtyna senimsizdik arttyrsaq, kelesi saılaýǵa odan da az adam keledi. Al nátıjesin ózimiz–aq sheshetin bolamyz" degen saıası tehnologııa sııaqty" – dep kúdiktendi ol.

Túske deıin bolǵan zańbuzýshylyqty tústen keıin-aq toqtatyp tastaýǵa bolatynyn aıtqan Sanjar Boqaev bılik qaǵam daýsynyń eshteńe sheshpeıtinin kórsetkisi kelgenin aıtyp qaldy. 

"Biz Toqaevtyń ne Qoshanovtyń ornyn alý úshin emes, jıǵan bilimizdi elimizge jaratý úshin saılaýǵa tústik. Maqsatymyz – halyqty alańǵa shyǵaryp, úlken qaqtyǵys jasaý emes. Bılik kishkentaı bala sııaqty. О́zi jasaǵan qatelikterin qalaı jasyraryn bilmeı otyr. Olar bizden emes artymyzdaǵy halyqtan qorqady"–  dedi Sanjar Boqaev.