"Nege tartynýym kerek?": Rınat Zaıytov "Amanat" partııasynyń qataryna qosylý sebebin túsindirdi

Rınat Zaıytov Instagram paraqshasynda "Amanat" partııasy májiliske usynyp otyrǵan tizimnen tabylýyna baılanysty pikir bildirdi.

"О́mir joly shynymen buralań-aý. Dál men "Amanat" partııasynyń quramynda bolady dep sizderdiń múldem oılamaǵandaryńyz aıtpasa da túsinikti. "Bul qalaı bolyp ketti?"- degen suraqtaryńyzǵa birinshi ózim jaýap bereıin.

Osy saılaýǵa deıin túrli jerde eldiń sózi sóıletetin bolsa, kez-kelgen múmkindikten bas tartpaıtynymdy aıtyp júrgenimdi ańǵarǵan shyǵarsyzdar? Sol múmkindiktiń úlkeni osy "Amanat". Kóńilimdegi kúnnen kúnge sóne bastaǵan úmit qaıta tutandy. Sebebi osy ýaqytqa deıin óz basym aty men zatynan aýlaq júrgen partııa áýeli atyn ózgertkende kúmánmen qabyldap edim. Búgin sol "Amanat" partııasy Qazaqstan memleketine ońdy ózgeris jasaǵysy keletinin kózime kórsetti, – dep jazdy aıtysker.

Ol partııa quramynyń ózgerýi oıyn ózgertkenin atap ótti.

"Quramyn 75% jańartqan partııada: Erlan Saıyrov, Amanjol Áltaı sekildi aǵalarymdy Ashat Aımaǵambetov, Maqsat Tolyqbaı, Nartaı Aralbaıdaı zamandas-baýyrlarymdy kórdim. Bul degenimiz, Erlan Jaqanuly Qoshanovtyń jańasha iske kirisýge jáne jańa saıası mádenıet qalyptastyrýǵa daıyn ekenin bildiredi. О́zime de sol ózgeriske qatysýdyń sátin týdyrdy. Nege tartynýym kerek? Iá, men óz otanymnyń ádiletti, turaqty, bir tildi, bir múddeli shynymen zaıyrly memleket bolǵanyn armandaımyn. Sol úshin de maǵan bul – óz oılarymdy tıisti jerge jetkizýge aparatyn tóte jol. Endeshe odan qur qyrsyqtyqpen bas tartý aqyldynyń isi emes. Eń bastysy, májilis minberinen oıymdy jetkizý. Endigi mindet partııanyń ǵana emes, memlekettiń de keleshek jumystaryna bilgenimniń sheńberinde úles qosý. Basqasynyń bári jaı sóz! Biz Amanatqa ózgerý úshin emes, ózgertý úshin keldik, –delingen jazbada.