Almaty oblysynda Ǵylym jáne joǵary bilim mınıstrligimen eki jaqty jol kartasy jasalady

Búgin Alamty oblysynyń ortalyǵy Qonaev qalasyna Ǵylym jáne joǵary bilim mınıstri Saıasat Nurbek jumys saparymen keldi, dep habarlady oblys ákiminiń baspasóz qyzmeti.

Mınıstr eń aldymen oblys ortalyǵynyń, jalpy alǵanda óńirdiń damý josparymen tanysty. Kemel jerdiń keleshegin aımaq basshysy Marat Sultanǵazıev aıtyp, bas josparǵa kiriktirilgen jobalardy taldap berdi.

Artynsha, mınıstr men ákimdik ókilderi dóńgelek ústelde bas qosty. Kún tártibindegi negizgi taqyryp, Qonaev qalasynnan akademııalyq qalashyqty qurýǵa arnaldy.

Kezdesý barysynda Almaty oblysy bilim basqarmasynyń basshysy Saltanat Bespaeva alǵashqy bolyp sóz alyp, taıaý bolashaqta atqarylar keleli ister týrasynda baıandama jasady.

О́ńirdiń bas ustazynyń aıtýynsha, osyǵan deıin Almaty oblystyq bilim basqarmasy QR Oqý-aǵartý mınıstrligine akademııalyq qalashyqta 1200 oryndyq Polıtehnıkalyq kolledj salý týraly usynys berip, ol mınıstrlikten qoldaý taýyp, oblys ákimi Marat Eleýsizulynyń atynan Úkimetke suranys hatta joldanǵan. Bul bastamany QR Premer-Mınıstri Álıhan Smaılovtyń ózi de qoldaıtyndyǵyn aıtqan edi.

О́ńirde akademııalyq qalashaqty qurýdaǵy maqsat-oblys aýmaǵynda ornalasqan kásiporyndar men sharýashlyqtarǵa qajetti bilikti mamandardy shet memleketten aldyrmaı, óz jerimizde daıarlaý.

QR Ǵylym jáne joǵary bilim mınıstriniń aıtýynsha, qazirgi tańda bilim salasyndaǵy basty túıitkil ınfraqurylymdy arttyrý bolyp tabylady. О́ıtkeni, el aýmaǵyndaǵy demografııalyq ósim men shet memeleketten stýdentterdiń aǵylyp kelýi dál osy máselemen betpe-bet keziktirip otyr.

Saıasat Nurbektiń aıtýynsha, qazirgi tańda Qazaqstanda bilim alatyn stýdentterdiń sany 626 myńdy qurasa, 2025 jyly bur kórsetkish 800 myńǵa jetse, 2030 jylǵa qaraı 1 mln-nan asyp jyǵylmaq. Sondyqtanda, akademııalyq qalashyqty salý asa mańyzǵa ıe.

Almaty oblysy Marat Sultanǵazıev Qonaev qalasynyń bas josparyna sáıkes, arnaıy jer qarastyrylǵanyn, kóktem aıynda bas jospar bekitilgennen keıin ınfraqurylymǵa qatysty jumystar óz jalǵasyn tabatyndyǵyn atap ótti.

«Aldaǵy ýaqytta, ózderińiz aıtqandaı ekonomıkalyq qolaıly aımaq qurylyp, ınfraqurylym jolǵa qoıylady. Shet elden keletin ustazdar qaýymyn turǵyn úımen qamtý máselesinde qarasytarmyz»,-dedi oblys ákimi Marat Eleýsizuly.

Jıyn barysynda mınıstr Saıasat Nurbek oblys bıligine aımaqtaǵy tapshy mamandar tizimin berýdi tapsyryp, Almaty oblysy ákimdigimen birlese otyryp, eki jaqty jol kartasyn daıyndaýdy usyndy. Bas qujat aldaǵy bir aptanyń ishinde rásimdelýi tıis ekenin qadap aıtty.

«Memleket basshysynyń tapsyrmasyna sáıkes, Qonaev qalasynan akademııalyq qalashyq salý josparlanǵan. Ol úshin oblys ákimdigimen kelise otyryp 100 gektar jer bólingen. Biz keleshekte sheteldiń damyǵan ýnıversıtetterimen kelissóz júrgizý arqyly osy mańda JOO ashyýdy kózdeýdemiz. Jospar boıynsha, G4 City –de úlken ındýstrııalyq, ónerkásiptik klasster ornalaspaq. Sol úshin arnaıy mamandardy daıyndaýymyz qajet. Jańadan qalyptasyp jatqan ónidiristik aımaqqa qajetti mamandardyń tizimin jasaqtap, kadrlyq tapshylyqty aıqyndaý kerek»,- dedi mınıstr Saıasat Nurbek.

Onyń aıtýynsha, búgingi kúni ınjenerlik-tehnıkalyq mamandardyń 70 paıyzdan astamy Almaty qalasyndaǵy ýnıversıtetterde daıarlanady, alaıda olardyń basym bóligi dál sol shaharda qalyp qoıyp, óndiriske shyqpaıdy. Sondyqtan aldaǵy ýaqytta ýnıversıtetterdi óndiristermen tyǵyz baılanystyryp, dýaldy formatqa kóshirý basty nazarǵa alynbaq, degen mınıstr artynsha oblystaǵy qos birdeı kásiporynǵa atbasyn buryp, óndiris oshaqtaryndaǵy qandaı mamandarǵa suranystyń artqanyn zerdeledi.

Mınıstr bas suqqan kásiporynnyń biri – «Mareven Fýd Tıan Shan».

2018 jyly elde irgesi qalanǵan zaýyttyń áleýeti joǵary ekeni anyq. 5 jyldyń ishinde óndiris kólemin 3 esege ulǵaıtqan bul jerde 900 adam eńbek etedi. Alaıda, belgili bir mamandyq ıesine suranystyń bary jasyryn emes.

Zaýyt Almaty enegergetıka jáne baılanys ýnıversıtetimen jáne de Almaty tehnıkalyq joǵary oqý ornymen baılanysta. Sonyń ózinde maman tapshylyǵy máselesi túbeıgi sheshimin tappaǵan. Mundaǵy jaýaptylar tehnıkalyq qurylǵylarmen jumys jasaıtyn ınjenerler men tehnologtardyń qajettigin búkpesiz aıtty.

Aımaqtaǵy zaýyttardaǵy kadrlyq áleýetke kóz júgirtken mınıstr Saıasat Nurbek, akademııalyq qalashyq salynyp, mamandar ózimizde oqytylǵanda máseleniń kúrmeýi tarqatylady dep sendirdi.

Esterińizge salamyz, Prezıdent Qasym-Jomart Toqaev 2025 jylǵa qaraı elge shet eldik eń myqty 5 joǵary oqý ornynyń bólimderin ashýdy tapsyrǵan. Byltyrdyń ózinde memleket basshysynyń pármeniniń sheńberinde 4 birdeı ýnıversıtettiń fılıaly ashylǵan edi. Mınıstr myrzanyń aıtýyna qaraǵanda, bıylǵy jyly taǵy da 6 JOO Qazaqstanǵa keledi. Olardyń ishinde Shotlandııanyń eń kóne tehnıkalyq ýnıversıteti Heriot-Watt-ta bar.

«Endigi kezekte bul bilim ordalaryn osyndaı arnaıy akademııalyq qalashyqtarǵa ákelý josparlanǵan. Mınıstrlik pen Almaty oblysy ákimdiginiń resýrstaryn biriktirip, biz Qonaev qalasyn úlken akademııalyq utqyrlyq habyna aınaldyrýǵa jospar quryp otyrmyz»,-dedi mınıstr Saıasat Nurbek.