Almatyda Qazaqstannyń ekonomıkalyq qaýipsizdigi taqyrybynda halyqaralyq konferensııasy bastaldy

Almatyda Kenjeǵalı Saǵadıev atyndaǵy Halyqaralyq bıznes ýnıversıtetinde "Saǵadıev oqýlary 2022 – QR-nyń Jańa ekonomıkalyq saıasaty: Búgini men perspektıvasy" taqyrybynda halyqaralyq-ǵylymı konferensııa jumysyn bastady.

Oǵan sheteldik jáne otandyq ǵalymdar, professorlar, JOO oqytýshylary, doktoranttar, magıstranttar qatysyp jatyr. 

Ǵylymı konferensııa Kenjeǵalı Saǵadıev atyndaǵy Halyqaralyq bıznes ýnıversıtetiniń rektory Anar Mahmetovanyń quttyqtaý sózimen bastaldy. Anar Mahmetova konferensııa talqylaýlarynyń barysynda túıindelgen usynystar el ekonomıkasynyń ósip-órkendeýine, otandyq ónimdi tıimdi paıdalaný jolynda kádege asatynyna senim bildirdi.

Plenarlyq otyrysta "Ekonomıkalyq-saıası daǵdarys jaǵdaıynda Qazaqstannyń ekonomıkalyq qaýipsizdigin qamtamasyz etý joldary" taqyrybynda baıandama jasaǵan Bilim jáne ǵylym mınıstrligi Ekonomıka ınstıtýty basshysynyń keńesshisi Naılıa Nurlanova Qazaqstandaǵy ekonomıkalyq qaýipsizdik máselesindegi negizgi problemalardy atady.

Ǵalym olardyń qataryna shıkizat pen onyń álemdik naryqtaǵy suranysyna degen táýeldilikti, joǵary tehnologııalyq óndiris úlesiniń tómendigin, álemdik naryqta básekelese alatyn taýarlardy óndiretin salalardyń kenjeleýin, memlekettik basqarýdaǵy bıýrokratızasııa men jemqorlyqty jáne óndiristik, kólik-logıstıkalyq, áleýmettik, kommýnaldyq ınfraqurylymnyń jetkilikti damymaýyn jatqyzady.

Sarapshy ekonomıkalyq qaýipsizdikti kúsheıtý úshin onyń quramdas bólikteriniń biri  –tehnologııalyq qaýipsizdikti damytýǵa basymdyq berý kerektigin atap ótti. Ol úshin tómendegideı usynystar bildirdi:

♦ Dástúrli salalardaǵy tehnologııalyq modernızasııa baǵytyn keńeıtý;

♦ Ǵylymǵa negizdelgen kúrdeli joǵary tehnologııalyq ónim shyǵaratyn óndiristerdi qurý;

♦ IT qyzmet salasyn damytý;

♦ 2050 jylǵa deıin ǵalymǵa bólinetin bıýdjet qarajatyn birtindep ulǵaıtý. Qarjylandyrý kólemin JJI-niń  0,5 paıyzyna, bıýdjettiń 1,7 paıyzyna deıin jetkizý;

♦Ǵylymdy uıymdastyrý men basqarýǵa, onyń ınfraqurylymdyq damýyna, qarjylandyrýdyń ashyqtyǵyna, ǵylymnyń kadrlyq potensııalyn arttyrýǵa, ǵalym mamandyǵynyń mártebesin kóterýge jańasha kózqaras qalyptastyrý;

♦ Ǵylymı kadrlardy daıarlaýda ǵylymı-zertteý ınstıtýtynyń quqyǵyn keńeıtý.

Plenarlyq otyrys barysynda ózge de ǵalymdar baıandama jasaıdy. Olardyń arasynda Halyq Fınastyń basqarma basshysy Farhad Ohonov, IQAA agenttigi Akkredıtasııa keńesiniń akademıgi Gennadıı Gamarnık, Management and Statistics of Forlì Bologna ýnıversıtetiniń (Italııa) professory Massimo Bianchi, Narhoh ýnıversıteti Akademııalyq keńesi tóraǵasynyń orynbasary Samajan О́mirzaqov, Qazaqstan ǵalymdary odaǵynyń prezıdenti Orazaly Sábden, Tuńǵysh prezıdent qory janyndaǵy Álemdik ekonomıka jáne saıasat ınstıtýtynyń keńesshisi Magbat Spanov bar.

Konferensııa jumysy búgin eki seksııa, erteń bes seksııa boıynsha jalǵasyp, 22 sáýir kúni dóńgelek ústelmen túıindeledi.