"Saıasatqa barar jol jińishke emes, jabyq". Áıelderdi saıasatqa aralastyrýdy talap etken mıtıng (Foto)

Almatydaǵy Sh.Ýálıhanov atyndaǵy alańda femınıstik qozǵalystardyń mıtıngi bolyp ótti. Beıbit jıynnyń kún tártibine Qazaqstandaǵy áıelderdi saıasatqa aralastyrý máselesi qoıyldy.

Uıymlastyrýshylar o basta byltyrǵydaı sherý jasaýdy josparlaǵan, alaıda qalalyq ákimshilik tek beıbit jıynǵa ruhsat bergen.

Alańda 500-den asa adam boldy.

Mıtıng qańtar oqıǵasy qurbandaryna arnalǵan bir mınýttyq únsizdikten bastaldy. Ary qaraı femınıstik qozǵalys ókilderi kezegimen kóz alyp, Qazaqstanda saıasatpen aınalysatyn áıelder sanyn kóbeıtý qajettigi týraly aıtty. Áıelderdiń názik jandy ekenin ǵana emes, olardyń myqty ekenin de udaıy umytpaýǵa shaqyrdy. Qazaqstanda áıelder er adamdarǵa qaraǵanda bir jarym mıllıonǵa kóp, memlekettik qyzmetkerlerdiń 55 paıyz áıel ekenine qaramastan, senatta 9, májiliste 28 depýtat qana otyrǵanyn, 1 ǵana áıel mınıstr men áıel ákim baryn synady. Áıelderdiń bıliktegi azshylyǵyna bıliktegi er adamdardy, qoǵamdaǵy patrıalhal túsinikterdi aıyptady. Jınalǵandar mundaı jaǵdaıdy ózgertý kerektigin, Qazaqstan qoǵamynan "áıel ákim", "áıel mınıstr", "áıel prezıdent" kóptep shyǵýy qajettigin atap ótti. "Áıel orny saıasatta", "áıel orny el basqarý isinde" dep urandatty.

Mıtıngte sondaı-aq áıelderdiń zeınet jasyn 58-ge deıin tómendetý talaby qoıyldy.

Belsendiler 2021 jyly turmystyq zorlyq-zombylyq saldarynan 67 áıel qaza tapqanyn aıtyp, turmystyq qylmysqa qarsy arnaıy zań qabyldaýdy talap etti. Qara tabytqa "2021 jyly 67 áıel seriktesiniń qolynan qaza tapqan" dep aq áriptermen jazyp, sımvoldyq túrde qurbandardyń óligin shyǵaryp perfomans jasady.

Eki saǵatqa jalǵasqan mıtıng sońynda Ýkraına halqyn qoldaý retinde "beıbitshilik úshin" fleshmoby uıymdastyrylyp, tútindi ot shashýlar atyldy.