Janbolat Mamaıǵa shetelge shyǵýǵa tyıym salynǵany habarlandy

Demokratııalyq partııa qurý boıynsha yntaly top jetekshisi, oppozısııalyq saıasatker Janbolat Mamaıdy shekarashylar Qazaqstannan shyǵarmaı qoıdy. Bul týraly onyń áıeli, jýrnalıst Inga Imanbaı habarlady.

Jýrnalıst emdelý úshin Bishkekke barmaq bolǵandarynda shekarashylar elden shyǵarmaı qoıǵandaryn, aldaǵy ýaqytta Janbolat Mamaıdy qamaýy múmkin ekenin aıtady.

"Búgin ony esh negizsiz Bishkekke ótkizbeı qoıdy. Biz onyń jaraqattaryn emdeýge shyqqan edik, sebebi, Almatydaǵy bir de bir aýrýhanaǵa sene almaımyz! Jańa ǵana otadan shyqqan adamdardy polısııa qolyna bere salǵan dárigerler buıryq bolsa ne istemeıdi?! Janbolat, biz, qashannan beri aıtyp kelemiz, eshkimnen qoryqpaımyz, eldiń ishinde kúresemiz! Eshqaıda ketý oıymyz joq! Shıetteı úsh bala men qart ata-anany tastap qaıda qashamyz?! Eldi-jerdi qımaıtynymyz óz aldyna, bala-shaǵany tastap qashpaıtyn shyǵarmyz! 1-2 kún barlyq medısınalyq tekserýlerin jasap, em-domyn alyp, qaıta keler edik. Biraq, bılik Janbolatty esh negizsiz shekaradan shyǵarmaı qoıdy. Shekaradaǵy jigitter barlyq suraqty Almaty qalasy krımınaldy polısııa departamentine qoıyńyzdar, solar shekteý qoıǵan dedi. Advokat resmı túrde esh shekteý joqtyǵyn, bul istiń zańsyz ekenin aıtyp, prokýratýraǵa shaǵym daıyndaýda. Kanat Taımerdenov, Rýstam Abdrahmanov, bul ne bassyzdyq?!
Berik Ýálı, Toqaevtyń beıbit narazylar jazalanbaıdy degeni qaıda?!
Abzal Quspan, Karınniń qoǵammen Sizder arqyly dıalog ornatyp, zańsyzdyqty toqtatý áreketi osy ma?!
Elvira Azimova, Siz Eýroparlamentte zańsyzdyqqa jol bermeıtinińizdi aıtyp, aqtaldyńyz. Al myna jaǵdaıǵa ne aıtasyz?!" deıdi jýrnalıst jelidegi jazbasynda.

5 qańtar kúni Almatydaǵy tártipsizdikter kezinde áldekimder Janbolat Mamaıdy soqqyǵa jyqqan.

20 qańtarda Janbolat Mamaı polısııa ózin "jappaı tártipsizdikter uıymdastyrdy" degen aıyp boıynsha tergeýge alǵaly jatqanyn málim etken.

"Almaty polısııasynan tergeýden shyqtym. 272-bap boıynsha (jappaı tártipsizdikter uıymdastyrý) tekserýge almaq. Búgin qorǵaýshymnyń densaýlyǵyna baılanysty tergeý keıinge qaldyryldy. "Sizdiń jappaı tártipsizdikterdi uıymdastyrǵandarmen baılanysyńyz bar-joǵyn tekseremiz" degendi aıtty. Bul istiń saıası astary bolatyny anyq. Kóremiz bıliktiń qandaı qadamǵa baratynyn" degen belsendi áleýmettik jelidegi jazbasynda.