Almaty oblysynda "Táýelsizdiktiń – Kóshkerýeni" saltanatty kezdesýi ótti

Almaty oblysynyń ortalyǵynda el Táýelsizdiginiń 30 jyldyǵyna arnalǵan «Táýelsizdiktiń – Kóshkerýeni» atty saltanatty kezdesý ótti, dep habarlady Almaty oblysynyń óńirlik kommýnıkasııalar qyzmeti.

Aýqymdy sharada 1991 jyly qasterli mekenniń azattyqqa qol jetkizgen kezeńinde atajurtqa atbasyn buryp, týǵan ólkeniń topyraǵyn basýdy ańsap kelgen baýyrlardyń basy qosyldy. 

Barshaǵa aıan, Táýelsizdiktiń – Kósh kerýeni Elbasymyzdyń Nurly – kósh baǵdarlamasy aıasynda júzege asyryldy. Osy ýaqyt aralyǵynda 1,5 mlln. qandas atamekenge qaıtyp oraldy. Onyń ishinde, 218 myńǵa jýyq jan Jer jannaty-Jetisý ólkesine taban tiregen edi. Bulda Táýelsizdik tartý etken basty syı boldy. 

1991 jyly Monǵolııa elinen arnaıy kósh bastap kelgenderdiń biri  Saǵat Zahanqyzy jáne Aıathan Turysbekuly saltanatty kezdesýdiń qadirli qonaǵy boldy. Mańyzdy bas qosýǵa olardan bólek, Almaty oblysy Ishki saıasat basqarmasynyń basshysy Rahmet Esdáýletov, Almaty oblystyq «Qandastar» qoǵamdyq birlestiginiń basshysy Qurmetbek Sansyzbaev pen  "Nur Otan" partııasy Almaty oblystyq fılıaly tóraǵasynyń birinshi orynbasary Gúlnar Toılybaeva sondaı-aq, oblystyq basqarmalar, qandastarymyz ben Táýelsizdik qurdastary qatysty.

Jıynda «Qazaq qundylyǵy ult ulylyǵy» jáne «Jyldar jylnamasy» atty qos kitaptyń tusaýy kesildi. Týyndynyń avtory Qurmetbek Sansyzbaıuly.

Kitaptardyń tusaýyn kesý rásimin Almaty oblystyq Jazýshylar odaǵynyń tóraǵasy Ámire Árin jáne jazýshy, aqyn Júkel Qamaıuly ótkizdi. 

Sóz sońynda aıta óteıik, 2021 jyly Almaty oblysynan 6023 etnıkalyq qazaq Qazaqstan Respýblıkasynyń azamattyǵyn qabyldady. Sonyń ishinde tórteýi El Táýelsizdiginiń 30 jyldyq mereıtoıyna tuspa – tus kelip, Qazaqstan Respýblıkasynyń azamattyǵyna ótti.