"Bıtkoındi men jasadym" degen adam 252 mlrd dollar úshin bolǵan sotta jeńdi

"Bıtkoındi men oılap taptym" dep málimdegen adam AQSh-taǵy iri sot isinde jeńdi. Nátıjesinde ol burynǵy seriktesine krıptovalıýtamen ondaǵan mıllıard dollar tólemeıtin boldy.

 

(Fotoda: Avstralııalyq kompıýter mamany Kreıg Raıt)

 

Avstralııalyq kompıýter mamany Kreıg Raıt 2016 jylǵy blog jazbasynda óziniń "Satoshı Nakamoto" ekenin málimdedi. Satoshı Nakamoto – bıtkoın jasaǵan adam nemese adamdar paıdalanatyn búrkenshik esim. Krıptovalıýta qaýymdastyǵyndaǵy kóptegen adam Raıttyń málimdemesine kúmánmen qaraıdy, óıtkeni ol "Satoshı óndirgen" dep boljanǵan burynǵy bıtkoınderdiń eshqaısysyn jyljytpaǵan.

Dúısenbi kúni Raıt Maıamıdegi azamattyq is boıynsha óziniń marqum bıznes seriktesi Devıd Kleımannyń otbasymen sottasty.

Qazirgi kezde Satoshı óndirgen jáne ustaǵan 1,1 mıllıon bıtkoınniń jartysyna qaýip tóndi, bul kesh qazirgi ýaqytta shamamen 54 mıllıard dollardy quraıdy.

Aıyptaýshy tarap Kleımannyń Raıtpen birge bıtkoındi qurýshy bolǵanyn jáne bul – Kleımange  Satoshıdiń boljanǵan baılyǵynyń jartysyn alýǵa quqyq beretinin aıtty.

Qazylar alqasynyń qorytyndy sózinde Raıt "ólgen eń jaqsy dosyn ótirik aıtyp aldap", bárin josparlap qoıǵany aıtyldy.

Aryzdanýshy tarap "Kleıman Raıtqa 252 mıllıard dollar turatyn blokcheın tehnologııasynyń zııatkerlik menshigin qurýǵa kómektesti" dep málimdedi.

Raıt Deıv Kleımannyń aǵasy Iranyń málimdemeleri "oıdan shyǵarylǵan" dep málimdedi. Ol dosynyń oǵan krıptovalıýtany shyǵarýǵa kómektespegenin aıtty jáne olardyń seriktestigi bar ekenin kórsetetin dálel joq ekenin jetkizdi.

Raıttyń advokaty Andres Rıvero úkimdi óz klıentiniń tolyq jeńisi dep sıpattady.

Vest Palm-Bıchtegi federaldy qazylar alqasy Raıtty jaqtap, Kleımannyń atyna bıtkoın berýden bas tartty.

Degenmen, Raıtqa eki adamnyń birlesken kásiporny "W&K Info Defence Research LLC"-ge qatysty zııatkerlik menshik quqyqtarynyń buzylýyna baılanysty 100 mıllıon dollar ótemaqy tóleýge mindetteldi. Bul aqsha Kleıman múlkine emes, tikeleı "W&K"-ge túsedi.

"W&K Information Defence Research LLC" kompanııasy sotta $100 000 000 alǵanyna óte qýanyshty ekenin málimdedi. Olar Kreıg Raıt bul somany zańsyz ıemdengenin jetkizdi.

Al, Raıt "bul óte jaqsy nátıje boldy jáne men ózimdi tolyǵymen aqtalǵandaı sezinemin" dedi sot úkimi shyqqannan keıin Twitter-de.

Raıttyń zańgeri "Talapkerler 600 mıllıard dollar talap etýmen qosa, jazalaýdy talap etti. Bul amerıkalyq sot prosesterindegi eń jarqyn jeńisterdiń biri. Biz olardy talqandadyq. Olardyń nátıjesi tipti biz olarǵa ózimiz kelisken usynystan azyraq. Bul ekinshi tarap úshin tolyq shyǵyn" dedi sot úkimi shyqqannan keıin telefonmen bergen suhbatynda.

2008 jyly, AQSh-ta qarjy daǵdarysy kezinde, Satoshı Nakamoto esimdi akkaýnt toǵyz bettik baıandama jarııalap, bıtkoın týraly alǵash málimdeme jasady. 

Birneshe aıdan keıin Nakamoto paıdalanýshylarǵa krıptovalıýtany óndirýge múmkindik beretin baǵdarlamalyq jasaqtamany shyǵardy.

Bıtkoınniń alǵashqy kúnderinde ony úıdegi kompıýterde óndirýge boldy. Ol kezde blokty utyp alýǵa 50 bıtkoın syıaqysy berildi. Búgingi kúni bul prosess arnaıy jabdyqty qajet etedi, ony negizinen kásibı mamandar jasaıdy jáne kodqa engizilgen ınflıasııaǵa qarsy sharanyń arqasynda blok syılyǵy 6,25 bıtkoınge deıin tómendedi.

Nakamoto 2011 jylǵa deıin belsendi boldy. Sodan keıin ol ózge bıtkoın ázirleýshilerge elektrondyq poshta arqyly "basqa isterge kóshkenin" aıtyp, jobany kenetten tastap ketti. Joǵalyp ketpes buryn, jumbaq akkaýnt "1,1 mıllıon bıtkoın óndirdi" dep sanalady.

Eger Raıt sotta jeńilgen bolsa, ol múlikti tóleý úshin Satoshı monetalarynyń keshin shyǵarýy kerek edi. Al, Raıt sotta jeńetin bolsa, óziniń ıeligin dáleldeıtinin aıtty. Ol sondaı-aq jeńiske jetetin bolsa, bıtkoındegi baılyǵynyń kóp bóligin qaıyrymdylyqqa berýge ýáde berdi.