Facebook Efıopııa premer-mınıstriniń postyn óshirip tastady. Nege?

Facebook Efıopııa premer-mınıstri Abıı Ahmedtiń jazbasyn óshirip tastady. Kompanııa bul áreketin "ol zorlyq-zombylyqqa qarsy áleýmettik jeli saıasatyn buzdy" dep túsindirdi.

Efıopııa premer-mınıstri azamattardy qarý alýǵa shaqyrǵan. Aqparatqa sáıkes ol "Tıgreı Halyqty Azat etý Maıdany"(THAM) dep atalatyn kóterilisshilerdiń alǵa jyljýyna tosqaýyl qoıý úshin post jarııalaǵan.

Kóterilisshiler sońǵy kúnderi negizgi qalalardy basyp alyp, úkimet kúshterine qarsy bir jyl boıy kúres júrgizdi.

Keıbir akkaýnttardyń zorlyq-zombylyqty taratý úshin Facebook-ty qoldanýy jıi synalady. Kompanııa osyndaı jaǵdaılardy toqtatý úshin ónimdi jumys isteı almaǵandyqtan aıyptaýlarǵa tap boldy.

Bas kompanııasy Meta dep ózgertilgen Facebook ókili "Biz Efıopııa premer-mınıstriniń jazbasy týraly habardar boldyq jáne  zorlyq-zombylyqty qozdyrýǵa, qoldaýǵa qarsy saıasatymyzdy buzǵany úshin postty óshirip tastadyq. Meta-da (bireý) qaýymdastyq standarttaryn buzsa, jeke tulǵalardyń nemese uıymdardyń kim ekenine qaramastan, jazbany alyp tastaımyz" dep málimdedi.

О́tken aıda Facebook kompanııasynyń ishki qujattary jappaı jarııalandy. Onda Efıopııadaǵy qarýly toptar etnıkalyq azshylyqtarǵa zorlyq-zombylyq jasaý úshin, sondaı aqparattardy taratý úshin Facebook platformasyn paıdalanyp jatqany anyqtaldy.

Qazan aıynda AQSh Senatynda sóılegen Frensıs Haýgen kompanııa AQSh-tan tys jerlerde óz qyzmet saıasattaryn durys júrgizbegendikten Efıopııa sııaqty qaqtyǵys aımaqtarynda "etnıkalyq zorlyq-zombylyqty týdyrýda" dep málimdedi.

Birikken Ulttar Uıymynyń málimeti boıynsha, Efıopııadaǵy qaqtyǵystardan myńdaǵan adam qaza tapqan, mıllıondaǵan adam bosqynǵa aınalyp, júzdegen myń adam asharshylyq jaǵdaıyna tap boldy.

Soǵys ótken jyldyń 4 qarashasynda Efıopııanyń premer-mınıstri Abı Tıgraıdaǵy aımaqtyq kúshterge qarsy áskerı shabýyl jasaýǵa buıryq bergen kezde bastaldy.

THAM terrorıstik uıym dep tanyldy, biraq uıym ózderin Tıgreıdiń zańdy úkimeti ekenin aıtady.

Aıta keteıik, jaqynda ǵana Facebook óziniń korporatıvtik ataýyn "Meta" dep ózgertti.

Keıbir sarapshylar Sýkerbergtyń bul qadamy nazardy Facebook-tyń aınalasyndaǵy jaǵymsyz oqıǵalardan basqa jaqqa aýdarý ekenin aıtady.