Murat Áıtenov qalanyń ulttyq sanaqqa daıyndyǵy týraly esep berdi

Qazaqstan Respýblıkasynyń Premer-Mınıstri A.Mamınniń tóraǵalyǵymen ótken selektorlyq májiliste Shymkent qalasynyń ákimi M.Áıtenov qalanyń ulttyq sanaqqa daıyndyǵy týraly esep berdi.

Halyq sanaǵy el turǵyndarynyń demografııalyq, ekonomıkalyq jáne áleýmettik jaǵdaıyn sıpattaıtyn naqty statıstıkalyq derekter jınaý úshin jasalady. Onyń qorytyndysy memlekettik damý baǵdarlamalaryn ázirleýge negiz bolady.

Ulttyq sanaqtyń 1-30 maýsym aralyǵynda ótken I kezeńine 29 nusqaýshy-baqylaýshy jáne 198 ıntervıýer tartylyp, qalanyń barlyq shaǵyn aýdandary men turǵyn alaptaryn aralap, turǵyn úılerdiń, adam turýy múmkin ǵımarattar men turǵyn emes úı-jaılardyń tizimin jasaqtaǵan.

Bıylǵy jylǵy 1-30 qazan aralyǵynda ótetin sanaqtyń II kezeńine 186 nusqaýshy-baqylaýshy jáne 1304 ıntervıýerler qamtylmaq. Bul jumystarǵa joǵary oqý oryndarynda, kolledjderde bilim alatyn stýdentter, nusqaýshy retinde nıet bildirgen muǵalimder, ádiskerler, úı jáne kóshe basqarýshylary, aýyl bıleri tartylýda.

Qala ákimi bul jumystardy uıymdastyryp, ótkizýge Shymkent qalasy tolyq daıyn ekendigin málimdedi.

Qala basshysy atap ótkendeı, sanaq naýqany barysynda qalyptasyp otyrǵan epıdemıologııalyq jaǵdaı barynsha eskerilgen. Sanaq personaly óz mindetterin atqarý barysynda sanıtarlyq talaptardy ustanady jáne koronavırýsqa qarsy vaksına alýda.

Qalanyń iri kásiporyndarynda, saýda ortalyqtarynda, halyqqa qyzmet kórsetý ortalyqtarynda, Kásipkerler palatasy ǵımaratynda, halyq kóp shoǵyrlanatyn jerlerge 100-ge jýyq sanaqtan onlaın ótý buryshtary daıyndalǵan.

Sanaq personaly úshin 155 nusqaýshylyq ýchaskeler belgilenip, olar keńselik qural-jabdyqtarmen, jıhazben, telefon baılanysy jáne ınternetpen qamtylǵan. Qala ortalyǵynan shalǵaıda jatqan aýmaqtarǵa shyǵý úshin 14 avtokólik daıyndalǵan.

Sanaq naýqanynyń máni men mazmunyn túsindirýde qala kóshelerine taqyryptyq 50 bılbord pen 4 tartpa ornatylǵan. Qoǵamdyq oryndar men qoǵamdyq kólikterge barlyǵy 5 myń dana aqparattyq paraqshalar ornalastyrylýda. Telearnalar men áleýmettik jelilerde 11 beınerolıktiń kórsetilimderi uıymdastyrylýda.