Shymkenttiń ishki oram kóshelerinde jóndeý jumystary júrgizilýde

Shymkent qalasynda búgingi tańda 182 nysan nemese 311,3 shaqyrym jol qurylys-jóndeý jumystarymen qamtylǵan. Jyl sońyna deıin 169 nysan, ıaǵnı 270,3 shaqyrym paıdalanýǵa beriledi.

Shymkent qalasynyń jolaýshylar kóligi jáne avtomobıl joldary basqarmasynyń basshysy Erjan Joldasov qala ákimdiginiń «Instagram» paraqshasynda ótken tikeleı efırde atqarylǵan jumystardy atap ótti. Basqarma basshysy jyl basynan beri júzege asqan jumystardy qorytyndylap, turǵyndar saýalyna jaýap berdi.
Búgingi tańda qalada Rysqulov-Qonaev kósheleriniń qıylysyndaǵy jolaıryq, Qonaev kóshesi jalǵasy qurylysy, magıstraldy kóshelerde ortasha jóndeý, ishki oram kóshelerde jóndeý jumystary júrgizilýde.
Rysqulov-Qonaev kósheleriniń qıylysyndaǵy jolaıyryq qurylysyn tolyǵymen aıaqtaý aǵymdaǵy jyldyń jeltoqsan aıyna josparlanǵan. Nysan qurylysyna jaýapty merdiger - «Bazis Construction» JShS.
Qonaev dańǵyly jalǵasy qurylysynyń 2 kezeńi jumystary «Sıtı Stroı» korporasııasy tarapynan atqarylýda. Qazirgi tańda atalǵan nysan boıynsha jer negizin jasaý jumystary júzege asyrylýda.
Qonaev dańǵyly jalǵasy qurylysynyń 3-shi kezeńiniń qurylys jumystary «KazahDorStroı» JShS -ne júktelgen. Búgingi tańda 700 m eki baǵytty aınalma temir jolyn, 948 m káriz qubyryn salý, 3,4 shaqyrym kabel jelileri, 24 temir jol elektr baǵanalaryn jáne 2 dana jer asty jaıaý júrginshiler ótkelderin ornatý jumystary oryndaldy.
Shymkent qalasy boıynsha 71 kóshe, ıaǵnı 49,8 shaqyrym joldy kúrdeli jóndeýden ótkizý josparlanǵan. Atap aıtqanda, Qarataý aýdany boıynsha 15,4 shaqyrym, Abaı aýdany boıynsha 9,1 shaqyrym, Eńbekshi aýdany boıynsha 9,1 shaqyrym jol kúrdeli jóndeýden ótedi.
Sondaı-aq, qazirgi ýaqytta Shymkent qalasy boıynsha jalpy uzyndyǵy 21,9 shaqyrym 9 magıstraldy kóshede ortasha jóndeý jumystary júrgizilýde.
Ishki oram kósheleri boıynsha jalpy 151 kóshe, 180,4 shaqyrym jóndeý jumystary qolǵa alynǵan. Qazirgi tańda 66 kóshede jóndeý jumystary aıaqtaldy.