"Úkimet máseleni jaqyn arada sheshpese, óz qolymyzǵa alamyz". Depýtat úkimetke talap qoıdy

Májilis depýtaty, "Aq jol" partııasy fraksııasy múshesi Qazybek Isa búgin májilistiń jalpy otyrysynda mádenıet salasyndaǵy shyǵarmashylyq ortalyqtardyń jumysyn júıelendirý máselesin kóterip, vıse-premer Eraly Toǵjanovqa depýtattyq saýal joldady.

Ol rýhanı jańǵyrýdyń negizi ulttyq múddeni qorǵaıtyn ulttyq bolmysty qalyptastyratyn eń aldymen ult rýhanııaty men mádenıeti – ulttyń zııaly qaýymy birikken shyǵarmashylyq odaqtar ekenin atap ótip,  memlekettiń strategııalyq seriktesi jáne qoǵamdaǵy ulttyq ıdeıalardyń qozǵaýshy kúshi bolýǵa tıis shyǵarmashylyq odaqtar qazir qarjylyq qıyndyqtardan shyǵa almaı, óz kúnderin zorǵa kórip kele jatqanyn aıtty.

– Qandaı eldiń damýynda da, eń aldymen mádenıettiń mańyzy zor! Ekinshi dúnıejúzilik soǵys kezinde Anglııanyń áıgili premeri Cherchıllge qarjy mınıstri el bıýdjetin kórsetedi. Sonda ol "Mádenıettiń shyǵyndary qaıda?" dep suraıdy. "Qaıdaǵy mádenıet soǵys kezinde?" depti mınıstr. Sonda Cherchıll: "Al biz onda ne úshin soǵysyp jatyrmyz, eger mádenıetti qorǵap qala almasaq?" degen eken. Iá, "Eger tiliń men mádenıetińdi saqtaı almasań, shekarańdy asha sal, báribir neńdi qorǵaısyń? Bul endi seniń eliń emes!" dep, Nelson Mandela týrasyn aıtqandaı, eldiń eń basty qorǵany – tili men mádenıeti, – deıdi depýtat.

Onyń aıtýynsha, byltyr prezıdent Q.Toqaevtyń tapsyrmasymen Shyǵarmashylyq odaqtardy qoldaý qory qurylǵan. Alaıda qor jumysy júrmeı jatyr. Shyǵarmashylyq odaqtar qarjy joq dese, Mádenıet mınıstrligindegi shyǵarmashylyq odaqtardy qoldaý úshin bıýdjetten bólingen 257 mıllıon teńge ıgerilmeı qaldy dep otyr.  Mınıstrlik munyń sebebi  shyǵarmashylyq odaqtardyń qujattary konkýrstyq talaptarǵa sáıkes kelmeýimen túsindiredi. Depýtat bul jaǵdaı másele zańdyq turǵyda rettelmegendikten týyndap otyr dep sanaıdy.

– Mundaı, qarjylyq qıyn jaǵdaıda, shyǵarmashylyq odaqtar óz múshelerine qalaı qoldaý jasaı alady? Negizinen, shyǵarmashylyq odaqtardyń qıyn jaǵdaıy olardy qarjylandyrý tetikteriniń zańnamalyq turǵyda tıimdi jolǵa qoıylmaǵandyǵynan bolyp otyr. Shyǵarmashylyq odaqtardyń muńyn da, mınıstrlikterdiń jyryn da túsinýge bolady. О́ıtkeni, bizdiń zańymyz boıynsha ulttyq múddemizdi qorǵaýǵa rýhanı nár beretin, ultshyl rýhty urpaqtar tárbıeleıtin Jazýshylar, Kompozıtorlar, Sýretshiler, teatr, kıno odaqtary, ıaǵnı Ulttyq tárbıege úıretetin odaqtar men ...ıt úıretetin odaqtardyń róli birdeı. Mundaı, 22 myń uıymnyń bárine bir kózben qarap otyrǵanda, bul másele eshqashan sheshilmeıdi. Sondyqtan, ulttyq bolmysymyzdy qalyptastyrýda mańyzy zor shyǵarmashylyq odaqtardyń rólin arttyrý úshin memlekettiń strategııalyq seriktestigi uǵymyn engizý kezek kúttirmes másele dep bilemiz. Bıyl táýelsizdigine 30 jyl tolyp jatqan elimizde, soǵys kezi emes, qudaıǵa shúkir beıbit kezeńde mádenıetimiz ben tilimizdi saqtap qala almasaq, biz ne úshin otyrmyz bul jerde? Eger úkimet bul máseleni jaqyn arada sheshpeı, súırete beretin bolsa, biz zańǵa ózgerister engizýdi óz qolymyzǵa alamyz, –  dedi Qazybek Isa.

Depýtat resmı saýalynda tómendegideı usynystar aıtady:

1. Shyǵarmashylyq odaqtardy qarjylandyrýdy zańnamalyq turǵydan sheshý úshin olarǵa memlekettiń strategııalyq seriktesi statýsyn berý kerek.

2. Shyǵarmashylyq odaqtardyń memleketpen áriptestik qyzmetin jandandyrý úshin mádenıet pen ónerdi damytý granttaryn taǵaıyndaý qajet.

3. Ulttyq bolmysymyzdy jat bolmystan qorǵaý úshin ulttyq ıdeologııalyq, Aqparattyq-rýhanı qaýipsizdik tetikterin jasaýdy shuǵyl qolǵa alý kerek.