"Koronavırýstyń úshinshi tolqyny". Erlan Qııasov qazaqstandyqtarǵa úndeý joldady

Qazaqstannyń bas sanıtar dárigeri Erlan Qııasov qazaqstandyqtarǵa úndeý joldady.

– Álem elderin indettiń qaıta taralýy alańdatyp otyr. COVID-19 vırýsynyń úshinshi tolqyny oryn alý qaýpi týyndady. Ásirese, vaksınasııa deńgeıi baıaý elderde vırýsty juqtyrý kórsetkishi kúrt artty. Jer júzinde 176 mıllıonnan astam adam vırýs juqtyrdy, kún saıyn 290 myńnan asa jańa derek tirkelip otyr. 3,8 mıllıonnan astam adam kóz jumdy. Qazaqstanmen shekaralas aımaqtarda qalyptasqan qaýipti jaǵdaı bizdi alańdatyp otyr. Reseı men Qyrǵyzstanda aýrý taralý kórsetkishi ótken jyldan da asyp tústi, – dedi ol.

Bas sanıtar dárigerdiń aıtýynsha, elde epıdemıologııalyq ahýal turaqty, turǵyndar arasynda vırýs juqtyrý tómendegen.

– Jaz aılarynda bizdiń kóptegen otandastarymyz alys-jaqyndaǵy shet memleketterge baryp demalýǵa aǵylady. Sonyń ishinde, SOVID-19-dyń taralýy boıynsha epıdemıologııalyq ahýaly alańdatarlyq elder de bar. Muny eskermeýge bolmaıdy. Shetelde demalýǵa nıetti azamattardy óziniń jáne jaqyndarynyń qaýipsizdigin qamtamasyz etýge shaqyramyn.

Vaksınasııa sizdiń aǵzańyzdyń vırýsqa qarsy qorǵanyshyn qamtamasyz etip, saıahatty qaýipsiz ótkizýge múmkindik beredi. Jazǵy demalysty alańdamaı, oıdaǵydaı ótkizý úshin COVID-19-ǵa qarsy ekpe alyńyz. Vaksınasııa sizge áýejaılarda esh qıyndyqsyz elge oralýyńyzǵa, ári ózińiz ben jaqyndaryńyzdy qaýipsiz sezinýińizge múmkindik beredi, – dep atap ótti Qııasov.