О́zine oq atqan polıseıge baılanysty istiń mán-jaıy belgili boldy

Pavlodar oblysy Jelezın aýdandyq prokýratýra dálizinde polıseı ózine oq atqan. Ol adam polısııa qyzmetkeri Rahym Ońbaev ekeni anyqtaldy. Istiń mán-jaıyn polıseıdiń ákesi Nurlan Ońbaev aıtyp berdi.

Onyń aıtýynsha, 23 mamyrda ulyn shuǵyl túrde prokýratýraǵa birneshe ret shaqyrǵan.

– Ulym jeksenbide jumysqa ketken. Birneshe saǵattan keıin onyń aýrýhanaǵa túskenin aıtty. Ulymnyń sózinshe sol kúni ony prokýratýraǵa birneshe ret shaqyrǵan. Ol saǵat 6-ǵa deıin jumysta qujattarǵa qol qoıyp shyqqan. Sol ýaqytta ol jumysta prokýratýra qyzmetkerleriniń ishimdik iship otyrǵanyn kórip, olardyń áreketterine narazy bolǵan. Olardyń ulyma ne aıtqanyn bilmeımin. Múmkin qorlaǵan shyǵar. Biraq olar shekten shyqqan. Sodan ulym sharasyz kúıde ashýlanyp, ózine oq atqan. Onyń aıtýynsha, oq atylǵannan keıin ol jerde qulap jatqan. Alaıda prokýratýra qyzmetkerleri kómek kórsetip, jedel járdem shaqyrýdyń ornyna ishken tamaqtaryn jıystyryp, baqylaý beınekameralardan vıdeolardy óshirdi. Keıin prokýratýraǵa óz jumystarymen kelgen jergilikti polısııa qyzmetiniń bastyǵyn kómekke shaqyrdym. Ol jedel járdemge habarlasyp, aýraýhanaǵa alyp barǵan, – dedi polıseı qyzmetkerdiń ákesi.

Zardap shekken polıseıdiń týystary bul oqıǵaǵa jańadan taǵaıyndalǵan prokýrordyń kómekshisin kinálap otyr.

– Prokýrordyń jańa kómekshisi kelisimen Rahym jıi jumysta qalatyn boldy. Ol oǵan únemi kiná taǵyp, kúnine birneshe ret jumys bólmesine shaqyratynyn aıtty. Byltyr tamyzda ol merziminen buryn polısııa maıory ataǵyn aldy. Ol óz jumysyn óte jaqsy kóredi. Ony bári sabyrly jáne baısaldy adam retinde biledi. Onyń otbasy bar, 4 jasar uly ósip keledi.

Meniń ulymdy osyndaı jaǵdaıǵa jetkizgen adamdar tıisti jazaǵa tartylýy kerek. Mundaı qyzmetkerler prokýratýra qatarynda jumys istemeýi kerek dep sanaımyn, – deıdi Nurlan Ońbaev.

Pavlodar oblysynda 23 mamyr 18:10-da aýdandyq prokýratýra ǵımaratynyń dálizinde 29 jastaǵy aǵa tergeýshi Rahym Ońbaev óziniń oń ıyǵyna oq atqan. Keıinnen polısııa qyzmetkeri aýrýhanaǵa jatqyzylyp, oǵan ota jasaldy. Qazir atalǵan is boıynsha tergeý jumystary júrgizilip jatyr.