Qorǵanys mınıstri vedomstvonyń bıylǵy jyldyń birinshi toqsanynda atqarǵan jumysynyń qorytyndysy, áskerdiń jaýyngerlik daıyndyǵy men tártibi, sondaı-aq sybaılas jemqorlyqqa qarsy qabyldanyp jatqan sharalar týraly baıandady.
Kezdesý barysynda Nurlan Ermekbaev áskerı medısınanyń PTR-zerthanalarmen qamtylýy jaıynda aıtty.
Mınıstrdiń sózinshe, Nur-Sultan jáne Almaty qalalarynda eki zerthana iske qosylǵan, al Aqtaý men Semeıde mobıldi keshen jumys istep tur. Ofıserler men sarbazdarǵa vaksına salý jalǵasýda. Búginde qarýly kúshter quramynyń 20 paıyzyna ekpe egilgen.
Mınıstr memleket basshysyna "Altyn jebe" arnaıy operasııasy jáne "Qalqan-2021" vedomstvoaralyq keshendi oqý-jattyǵý jıyndarynyń nátıjeleri, sondaı-aq, ekinshi jartyjyldyqqa josparlanǵan "Otpantaý" strategııalyq oqý-jattyǵýǵa daıyndyq jóninde esep berdi.
Ermekbaev Toqaevqa Qazaqstannyń halyqaralyq áskerı yntymaqtastyq baǵyttary, qarýly kúshterdi áskerı tehnıkamen jabdyqtaý, qarýly kúshterdiń tujyrymdamasyn damytý jumystary týraly aıtty.
Kezdesý sońynda joǵarǵy bas qolbasshy qorǵanys mınıstrine elimizdiń qorǵanys qabiletin odan ári arttyrýǵa baǵyttalǵan birqatar tapsyrma berdi.
Pikir qaldyrý
pikir