Depýtat 15 jastaǵy qyzǵa jynystyq qatynas úshin 1 mln teńge bergen be?

Ustalǵany habarlanǵan Aqtóbe oblysy máslıhatynyń depýtaty Arkadıı Nı isi tóńireginde túrli aqparat tarap jatyr.

Depýtattyń ustalǵany týraly aqparat shyqqanyn alǵash premer-mınıstrdiń shtattan tys keńesshisi Erbol Edilov telegram kanalynda habarlanǵan.

Artynsha, Aqtóbe oblystyq polısııa departamenti tengrinews.kz tilshisine depýtattyń ustalǵanyn rastaǵan. Biraq qandaı aıyp taǵylyp otyrǵanyn ashyp aıtpady.

Uzamaı NurOtan partııasynyń Aqtóbe oblystyq fılıaly saıası keńes bıýrosy Arkadıı Nı partııa qatarynan shyǵarylǵanyn málimdedi.

Qylmystyq is týraly naqty resmı aqparat taramaǵanymen, túrli telegram arnalar men birqatar saıttarda qylmystyq istiń "barysy" týraly jazyla bastady.

"Chınovnık kz" kanaly Aqtóbede 4 jeltoqsan kúni 2005 jylǵy qyz 1984 jylǵy anasyna aryzdanyp polısııaǵa júgingenin habarlady.

"Anasy ákeleri bólek 4 qyzdy ósirip otyr. Qyzdyń sózinshe, sheshesi depýtat Nımen eki ret tamyz jáne qazanda jynystyq qatynasqa túsýge májbúrlegen. Nı 5 jeltoqsanda Aqtóbe áýejaıynda ustalǵan. 5 jeltoqsannan bastap ýaqytsha ustaý ızolıatorynda. Kinásin tolyqtaı teristeıdi" delingen jazbada.

Ratel.kz saıty depýtatqa qylmystyq kodekstiń 122-baby (on alty jasqa tolmaǵan adammen jynystyq qatynas nemese seksýaldyq sıpattaǵy ózge de áreketter jasaý) boıynsha aıyp taǵylyp otyrǵanyn habarlady.

Sondaı-aq basylym depýtat qyzben birneshe ret qatynasqa túskenin, alǵashqy jynystyq qatynas úshin 1 mln teńge, odan keıingi qatynastarǵa 50 myń teńge tólegeni, jalǵa alynǵan páter anyqtalǵany týraly jazdy.

"Depýtattyń advokaty aqsha qyzdyń anasyna materıaldyq kómek esebinde berilgenin aıtyp jatyr. Polısııaǵa  egde jastaǵy er adam arendaǵa alynǵan páterge jas qyzben kelgeni týraly aqparatty qyraǵy turǵyndar bergen" delingen bbasylym taratqan aqparatta.

Aqtóbe oblystyq máslıhatynyń saıtynda Arkadıı Nı 1961 jyly 25 naýryzda Qyrǵyzstan Respýblıkasy Bishkek qalasynda dúnıege kelgeni, 2006 jyldan bastap qazirgi ýaqytqa deıin Aqtóbe qalasyndaǵy "ROKOS" KT basshysy ekeni jazylǵan. Sondaı-aq ol Aqtóbe oblystyq máslıhatynyń 5-6 shaqyrylymdarynyń depýtaty, Qazaqstan káristeri qaýymdastyǵy keńesiniń Aqtóbe fılıalynyń basqarma múshesi, "Qazaqstan Tennıs Federasııasynyń" AQB Aqtóbe oblysy boıynsha fılıalynyń dırektory.