Qazaqstan týyn balkonǵa ilýge ruqsat berildi

Endi týdy ǵımarattarǵa, ǵımarat ishindegi páter balkondarynda jáne merekelik is-sharalar ótkiziletin jerlerde paıdalanýǵa bolady. Bul týraly zakon.kz saıty habarlady. 

27 qarashada premer-mınıstr Asqar Mamın ǵımarattardyń qasbetterine memlekettik týdy ilýge ruqsat beretin "Qazaqstan Respýblıkasynyń Memlekettik týyn, Memlekettik eltańbasyn jáne olardyń beınelerin, sondaı-aq Qazaqstan Respýblıkasynyń Memlekettik Ánuran mátinin paıdalaný (belgileý, ornalastyrý) erejelerin bekitý týraly" Qazaqstan Respýblıkasy Úkimetiniń 2007 jylǵy 2 qazandaǵy qaýlysyna ózgerister men tolyqtyrýlarǵa qol qoıdy.

Qaýlyǵa sáıkes, Erejede 4-tarmaqtyń birinshi abzasy tómendegideı kórsetilgen:

Qazaqstan Respýblıkasynyń memlekettik týyn jeke jáne zańdy tulǵalarǵa patrıottyq sezimderin, qazaqstandyq biregeıligin bildirý, eldiń, onyń azamattarynyń jetistikterin qoldaý maqsatynda ǵımarattarda (turǵyn jáne turǵyn emes úı-jaılarda), ǵımarat ishindegi páter balkondarynda jáne merekelik is-sharalar ótkiziletin jerlerde paıdalanýǵa (ornatýǵa) bolady.

Buǵan deıin Qazaqstan prezıdenti Qasym-Jomart Toqaev memlekettik rámizderdi paıdalaný erejelerin qaıta qaraý týraly usynys jasaǵan bolatyn.