Foto: Tabystaý sátinen

Tuńǵysh prezıdent kúnine oraı Úshtóbe qalasynyń «Shańyraq», «Kókdala» shaǵynaýdandarynda kópqabatty jáne jeke jalgerlik turǵyn úıler paıdalanýǵa berildi. Saltanatty sharaǵa aýdan ákimi Qaırat Buldybaev 50 otbasyǵa páter kiltin tabystady.

Qaratal aýdanynda turǵyn úı máselesi kezeń-kezeńimen sheshimin taýyp keledi. Dál osy «Kókdala» shaǵynaýdanynda buǵan deıin de qonystoıy toılanǵan bolatyn. Mine, aıtýly mereke qarsańynda taǵy da 20 úı salynyp, kópbalaly otbasylar shattyqqa keneldi. Bul úrdis odan ári de jalǵasyn tabady. Keler jyly da dál osy aımaqtan jeke jalgerlik úı turǵyzylady dep kútilýde. «Shańyraq» shaǵynaýdanynda boı kótergen kóppáterli úı zaman talabyna saı. Onda bir, eki jáne úsh bólmeli páterler bar.

«Shańyraq» shaǵynaýdanyndaǵy baspanalarǵa respýblıkalyq bıýdjetten 223 mln.972 myń teńge bólinse, oblystan 95 mln.799 myń teńge jumsaldy. Al «Kókdala» shaǵynaýdanynda salynǵan 20 jeke jalgerlik turǵyn úı qurylysyna respýblıkalyq bıýdjetten 180 mln.404 myń teńge, oblystan 100 mln.432 myń teńge bólingen. Qurylysty «Qolqanat qurylys» JShS júrgizdi. Boı kótergen árbir shańyraq óte sapaly jáne belgilengen ýaqytta paıdalanýǵa berildi. Jeke jalgerlik úıdiń mańaıy abattandyrylǵan. Qosymsha turmysqa kerekti nysandarmen de qamtylǵan.

Atalǵan úıler aýdan boıynsha kezekte turǵan muqtaj azamattarǵa, kópbalaly otbasylarǵa berildi. Qonystoıynda sóz alǵan Qaırat Naımanbaıuly:

 – Mine, mereke qarsańynda qonystanǵan baspanalaryńyz qutty bolsyn. Memlekettiń osyndaı ıgi isteri aldaǵy ýaqytta da jalǵasyn tabatyn bolady. Búginde Qaratal aýdanynda kópbalaly otbasylardy jáne úı kezeginde turǵan turǵyndardy baspanamen qamtamasyz etý máselesi basty nazarda. Bul oraıda oblys ákimi Amandyq Batalovtyń qoldaýymen aýdanymyzda jyl saıyn turǵyn úıler boı kóterip, jańa shaǵynaýdandar qanat jaıyp, qalamyzdyń ajaryn asha túsýde, – dedi.

Qonystoı sońynda páter kiltin ıelengender oblys, aýdan basshylyǵyna rızashylyǵyn bildirip, alǵys jaýdyrdy.

"Qamshy" silteıdi
Ilmek sózder: 50 páter

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir