Saǵyntaevtyń 8 jylǵa sottalǵan kúıeý balasy men "qymbat kıimge qumar" qyzy

Brıtandyq Financial Times basylymy Almaty ákimi Baqytjan Saǵyntaevtyń qyzy Merýert Ibragım Net-a-Porte ınternet-dúkeninde "óte mańyzdy tutynýshy" (EIP, extremely important person) statýtysyna ıe ekenin aıtty. Bul statýsty kóp saýda jasaıtyn klıentterge beredi, dep jazady exclusive.kz.

Azattyq radıosynyń málimetinshe, ákimniń qyzy turaqty saýda jasaıtyn Net-a-Porter dúkeni Eýropanyń sán álemindegi sońǵy úlgidegi kıimderdi satady.

Brıtandyq Financial Times basylymy ótken aptada Merýert Ibragımniń London, Qazaqstan jáne Dýbaı arasynda qalaı saıahattaıtynyn jáne qymbat brend kıimderdi qalaı satyp alatynyn egjeı-tegjeıli jazǵan. Onyń burynǵy kúıeýi Bahyt Ibragım bank aqshasyn jymqyrǵany úshin birneshe jylǵa bas bostandyǵynan aıyrylǵan.  

Financial Times reportery EIP statýsy turaqty klıentterge "qarapaıym adamdarda" joq artyqshylyqtar týraly aıtyp berdi. Máselen, olarǵa jeke kórsetiledi, túrli sharalarǵa shaqyrý qaǵazy beriledi. Arnaıy klıentter jańa túsken kıim úlgilerin saıtqa jarııalanbas buryn satyp ala alady. Bir jylda eki márte jeke shopperdiń qyzmetine júginip, alty aıǵa aldyn ala tapsyrys bere alady.

EIP statýsyn alý úshin belgilengen somaǵa kez kelgen kategorııa boıynsha saýda jasaýǵa bolady. Net-a-Porter naqty somasyn aıtýdan bas tartty.

Dúken jumysyn zertteý úshin Financial Times reporteri de atalmysh statýsqa ıe bolǵan. Net-a-Porter dúkeni sol úshin odan 10 myń fýnt (5 mıllıon 662 myń tenge) ustap qalǵan.

Financial Times basylymynyń aıtýynsha, saıtta Baqytjan Saǵyntaevtyń qyzy Merýert Ibragım Buro24/7 qazaqstandyq sán jobasynyń negizin qalaýshy dep kórsetilgen. Saıtta Merýert Ábdirdiń "mańyzdy satyp alýshy" qataryna kirgenine 3 jyl bolǵany aıtylady.

Reporter brend kıimderdiń qansha turatynyn da aıtty. Etik – 585 fýnt sterlıng (331 myń teńge), jeıde – 515 (291 myń teńge), sómke – 1 250 (707 myń teńge), plash – 2 175 fýnt sterlıng turady.

Buǵan deıin Almatynyń Almaly aýdandyq soty RBK Bank aqshasyn jymqyrdy dep aıyptalǵan 37 adamǵa sheshim shyǵardy. Onyń ishinde Qazaq Bank-tiń burynǵy aksıoneri men Saǵyntaevtyń burynǵy kúıeý balasy da bar. Bahyt Ibragımov 8 jylǵa bas bostandyǵynan aıyryldy jáne múlki tárkilendi.