Qoǵam belsendisi Ǵaly Baqtybaevtyń ólimine qatysty tyń derekter jarııalandy, dep habarlady Tengrinews.kz.

Tergeý málimetteri boıynsha, qoǵam belsendisi Ǵaly Baqtybaevty tapsyryspen óltirýi múmkin degen nusqa bar. Oryndaýshyǵa mıllıon teńge ýáde etilgen.

Qazirgi ýaqytta qylmystyq isti Qaraǵandy oblysynyń qylmystyq ister jónindegi mamandandyrylǵan aýdanaralyq sotynyń sýdıasy Qaırat Qasymov qaraýda. Sot talqylaýlary kýálardan jaýap alý satysynda. Otyrystar alqabılerdiń qatysýymen ótedi.

Aıyptaý boljamyna sáıkes, tapsyryspen kisi óltirýdi uıymdastyrýshylar Atasý kentiniń turǵyndary – bıznesmen Azamat Bókenaev jáne eks-polıseı Ǵalym Ahmedjanov. Bókenaevtyń kólik jýý orny bolǵan, al Ahmedjanov jergilikti polısııa bólimine qarasty tirkeý-emtıhan toby basshysynyń orynbasary bolyp jumys istegen. Olardyń Baqtybaevqa degen dushpandyq kózqarastary bolǵan, sebebi belsendi ústilerinen túrli shaǵymdar túsirip otyrǵan.

Derekter boıynsha, 2019 jyly Bókenaev jáne Ahmedjanov aýyl turǵyndary Iman Mııashov pen Eldar Jákenovke belsendini soqqyǵa jyǵý týraly ótinish jasaǵan. Tergeý málimetteri boıynsha, sottalýshylar belsendige shabýyl uıymdastyryp,  ony qorqytpaq bolǵan.  Onyń ornyna Azamat Bókenaev Iman Mııashevke 150 myń teńge qaryzyn keshiremin degen.

Qujatta kórsetilgendeı Mııashev pen Jáken belsendiniń úıine barǵan. Olar onyń dalaǵa kómir alýǵa shyqqan sátin paıdalanyp, shabýyl jasaǵan. 

"Soqqyǵa jyǵylǵan Baqtybaev shaǵym jazýdy toqtatpaǵan. Sol kezde Bókenaev jáne Ahmedjanov ony óltirýdi josparlap, Mııashevtyń kómegine júgingen" delingen qujatta. Uıymdastyrýshylar kisi óltirý úshin oǵan qarý men bir mıllıon teńge usynǵan. 

Qoǵamdyq belsendisi 2019 jyldyń  28 mamyrynda óz aýlasynda qaıtys boldy. Tergeý málimetteri boıynsha, Iman Mııashev oǵan 15-20 metr qashyqtyqtan eki oq atqan, sodan keıin ol oqıǵa ornynan qashyp ketken. 

Qylmystyq oqıǵa oryn alǵannan keıin Mııashev izin jasyryp, Aqmola oblysyna qashyp ketip, Aqsý kenishinde kúzetshi bolyp jumys istegen. Alaıda ol sol jerde basqa kúzetshilermen tóbelesip, nátıjesinde polısııa ony ustaǵan. 

28 jastaǵy Iman Mııashevke qylmystyq kodekstiń birneshe baby boıynsha aıyp taǵyldy: "qarý qoldanyp buzaqylyq jasaý"," densaýlyqqa qasaqana aýyrlyǵy ortasha dárejedegi zııan keltirý"," adam óltirýge oqtalý"," adam óltirý jáne "atys qarýyn zańsyz ıemdený, berý, ótkizý, saqtaý, tasymaldaý nemese alyp júrý".

Onyń seriktesi, 31 jastaǵy Eldar Jákenge "densaýlyqqa qasaqana ortasha zııan keltirý" degen aıyp taǵyldy.

40 jastaǵy Azamat Bókenaev pen 41 jastaǵy Ǵalym Ahmedjanov "densaýlyqqa qasaqana aýyrlyǵy ortasha dárejede zııan keltirýdi uıymdastyrý" jáne "kisi óltirýdi uıymdastyrý" baptary boıynsha aıyptalýda.

"Qamshy" silteıdi

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir