Uıadan ushqan kún: Qııaǵa emes, tozaqqa qonǵan qyzdyń áńgimesi

Tengrinews.kz saıty Sırııadan Qazaqstanǵa qaıtarylǵan áıeldiń ómirin baıandady. О́zgelerge sabaq bolady degen úmitpen maqalanyń qazaq tilindegi nusqasyn nazarlaryńyzǵa usynamyz. 

Janna bolashaq jarymen JOO-da tanysty. Murat birden Jannaǵa basyna oramal salýǵa úgitteıdi. Janna ýaqyt óte kele kıiný stılin ózgertedi. Jannanyń ata-anasy buny qup kórmeıdi. Onyń ústine qyzdarynyń Murattyń aıtqandaryn buljytpaı oryndaıtynyn jaqtyrtpaıdy. Ákesi Jannany Muratpen qarym-qatynasty toqtatýǵa úgittegenimen nátıje shyqpaıdy. Janna kóp uzamaı Muratqa turmysqa shyqty. 

Otbasylyq ómirdiń birinshi kúni-aq Murat áıelinen memlekettik jumystan shyǵyp, qara kıim kııýin talap etedi. Sharıǵat boıynsha ómir súrmeıtin ata-anasymen aralasýǵa tyıym saldy. О́zi kúni boıy "baýyrlarymen" páterde sheıhterdiń leksııasyn tyńdap, úıge ashýlanyp keletin bolǵan. Janna úshin bes jylǵa sozylǵan otbasylyq ómir psıhologııalyq jáne qarjylyq qıyndyqqa toly boldy.

Qarjynyń tapshylyǵy, baspananyń joqtyǵy, órkenıetti eldiń ómir saltynan mezi bolǵan Murat Sırııaǵa ketýdi uıǵarady. Jannanyń ata-anasy qyzyn elde qaldyra almady. Áıel adam kúıeýiniń artynan erip júrýi kerek degen prınsıpti ustanǵan Janna ata-anasynyń kóz jasyna qaramastan eki balasyn alyp Murattyń artynan erip ketedi. Olar birinshi Túrkııa men Sırııanyń shekarasyna jetedi. Bir aıdan keıin Sırııanyń naǵyz soǵys maıdanyna aınalǵan Idlıb qalasyna jol tartady.

Janna kishkentaı eki balasymen sý, jaryq, jylý, tamaq, dári-dárimek joq, snarıadpen tóbesi tesilgen úıde turýǵa májbúr bolǵan.

Murat DAISh-qa qarjy tabý maqsatynda Qyrǵyzstanǵa baryp, bankty tonaýǵa tyrysqan. О́zin musylman dep ataǵan adamdardyń bir-birin óltirip, áıelder bir erkektiń qolynan ekinshisine ótip sodyrlardyń qoljaýlyǵyna aınalǵan. Al otbasylar óz erkimen elderine qaıta almaı qınalǵan. Munyń bárin kórgennen keıin Janna úshin kúıeýi aıtqan taza, kirshiksiz álem kóz aldynda qubyjyqqa aınaldy.

Janna jolserikke jalynyp kómek surap eki balasymen zańsyz shekaradan ótedi. Ol kezde Janna úshinshi balasyna aıaǵy aýyr bolatyn. Ulttyq qaýipsizdik komıtetiniń kómegimen Janna balalarymen Qazaqstanǵa qaıtaryldy.

Qazaqstanda tyıym salynǵan uıymda bolǵany úshin Janna 5 jylǵa sottaldy. Ulttyq qaýipsizdik komıteti ókilderiniń aıtýynsha, Jannanyń psıhologııalyq jaǵdaıyn jaqsartý ońaıǵa soqpady. Sırııada onyń sanasyna ábden sińip qalǵan túsinikterden aryltý úshin kóp jumys atqaryldy.

Psıhologtar, dintanýshylar, Jannanyń otbasy onyń ýlanǵan dinı kózqarasyn ózgertý úshin baryn saldy. Ulttyq qaýipsizdik komıteti ókilderi Jannanyń ózgergenin, qazir álemge basqa kózben qaraıtynyn aıtady. Úsh jyldan keıin Jannany merziminen buryn bosatý týraly ótinishi qanaǵattandyryldy.

Mamandardyń arqasynda Janna ózine senimsiz, uıań áıelden bolashaqqa naqty jospary bar, destrýktıvti oıdan ada adamǵa aınaldy.

Janna qazir balalaryn mahabbatqa bólep júrgen qamqor ana. Úsh jyl boıy baýyr eti balalaryn qaraǵan ata-anasyna rızashylyǵy zor.

Janna ótken ómirindegi keleńsizdekterdi synaq retinde qabyldap, odan qorytyndy shyǵara bildi.