• USD 424.85

  • EUR 504.21

  • RUB 5.84

  • CNY 65.86

18 Qazan, 04:11:35
Almaty
+3°

Abaqtydan shyǵyp, qoǵamǵa sińý bir sáttik kórinis bolǵanymen, qoǵamǵa beıimdelý biraz eńbekti talap etedi. Túrmedegi tártip pen qoǵamdaǵy erkindiktiń arasyn sáıkestendirý birshama ýaqytqa sozylatyny ras. Osy oraıda «Máńgilik Qazaqstan» qoǵamdyq qory Almaty Qoǵamdyq damý basqarmasynyń qoldaýymen buryn isti bolǵan azamattarǵa psıhoáleýmettik dıagnostıka jumystaryn júrgizdi. Bul is-shara qalalyq probasııa qyzmetiniń ınspektorlarymen birlesip júzege asyryldy. Bul joly psıhoáleýmettik dıagnostıkaǵa Túrksib aýdanynyń probasııa qyzmetinde tirkeýde turǵan 40-shaqty adam men Naýryzbaı aýdany probasııa qyzmetiniń tizimindegi 50-ge tarta adam qamtyldy.

Bilikti psıholog Janna Iаvorskaıa men zańger, tolystaǵy polkovnık Muhamedjan Toqtaǵul ótkizgen dıagnostıkada sotty bolyp, túzeý mekemesinde jazasyn ótep shyqqan jandarmen dıalog júrdi. Psıholog hanym olarǵa saq qaǵazǵa sýret saldyryp, sonan soń sýretke qarap sýret avtorlarynyń jan-dúnıesine baǵa berdi. «Men sýret saldyrǵanda qatysýshylarǵa sýrettiń janyna óz esimderin jazbaýdy suradym. Sebebi psıhoáleýmettik dıagnostıka jasaǵanymda sýret avtorynyń kóńiline jaqpaıtyn sóz aıtyp qalýym ábden múmkin. Men olarǵa paıdaly bolý úshin ádil aqparat aıtýǵa tıispin», deıdi J.Iаvorskaıa. «Keıbir kisiler sýretti qaǵazdyń ortasyna nemese buryshyna kishkentaı etip salady, – dep sózin jalǵady psıholog bizge bergen suhbatynda, – Bul olardyń boıynda áldebir qorqynysh baryn kórsetedi. Sosyn olarǵa kez kelgen adamnyń sýretin salyńdar dep edim, bireýi aıaq-qoly joq qyzdyń sýretin beınelepti. Meniń oıymsha ol sýrettiń avtory qarama-qarsy jynystaǵy adamdarmen aralasa almaıdy. Kommýnıkasııalyq qabiletin shyńdaýy kerek. Men jasaǵan joramaldardyń bári júz paıyz shyndyq emes, gıpoteza bolyp sanalapdy. Biraq psıhologııa ǵylymynda bul ádistiń dıagnostıkalyq qyry dáleldengen».

Zańger M.Toqtaǵuldyń sózinshe qatysýshylar arasynda aıaǵyn ańdap basatyn, saq adamdardyń sany kóp. «Aýzy kúıgen úrlep ishedi» demekshi, jigitter tártibin túzep, jańa ómirge umtylǵysy keledi. Men olarǵa dıagnostıkalyq sabaq retinde «shekarany buzbaý» degen tásildi túsindirdim. Qylmystyń kóbi bireýdi jeke ómirine qol suqqanda oryn alady. Adamdar emosııaǵa berilip, keıde mundaı shekaranyń bar ekenin umytyp ketedi de, basqalarmen soqtyǵysyp, jazaly bolady. Eń bastysy qatysýshylardyń boıynda saqtyq sharalary bar», deıdi zańger.

Al jobany uıymdastyrýshy B.Nálibaev atalǵan is-shara bas bostandyǵynan aıyrý ornynan shyqqan adamdardy áleýmettik beıimdeý maqsatynda júrgizilip jatqanyn aıtady. «Joba aıasynda psıhoáleýmettik baǵdarlamalar uıymdastyrý degen tarmaq bar. Dıagnostıkalyq jumystar sonyń aıasynda atqarylyp jatyr. Budan bólek keıbir sotty bolǵan azamattar men azamatshalardyń otbasyna áleýmettik kómek kórsettik. Sonymen qatar psıhoáleýmettik dıagnostıkalar túrme ishinde de júrgizildi» deıdi ol.

N.Naýryzálıev 

"Qamshy" silteıdi

Qate tapsańyz, qajetti bólikti tańdap ctrl+enter basyńyz.

Pikir qaldyrý

pikir