Turǵymbaev qaza tapqan polıseılerdiń otbasylaryna kóńil aıtty

Ishki ister mınıstri Erlan Turǵymbaev búgin qyzmettik boryshyn atqarý kezinde qaza tapqan ýchaskelik polısııa ınspektorlary Qanat Otarbaev pen Qanat Hamıdýllınniń otbasylaryna kóńil aıtty. Bul týraly mınıstrliktiń resmı saıty málimdedi.

– Olardyń kásibıligi men parasattylyǵyn, óz qyzmetine adaldyǵyn basshylyq ta, halyq ta baǵalaǵan. Olar áriptesteriniń arasynda syıly boldy. Ishki ister organdarynyń barlyq jeke quramy qaza tapqandardyń týystary men jaqyndarymen birge qaıǵyrady, – dedi mınıstr Erlan Turǵymbaev.

Búgin Shýchınsk qalasynda jol-kólik oqıǵasynan eki polıseı qaıtys bolǵan. Polısııa qyzmetkerleri jedel-izdestirý is-sharalaryna qatysyp, oqıǵa ornynan qaıtyp kele jatqan. Osy kezde "Leksýs" kóliginiń júrgizýshisi jol erejelerin elemeı, baǵdarshamnyń qyzyl shamynan joǵary jyldamdyqpen ótip, "Nıva" qyzmettik kóligimen soqtyǵysqan. Polısııa qyzmetkerleri alǵan jaraqattyń saldarynan oqıǵa ornynda kóz jumdy.

Ishki ister mınıstrligi málimetinshe, júrgizýshi buryn kólikti mas kúıde júrgizgeni úshin júrgizýshi kýáliginen aıyrylǵany anyqtaldy. Qazirgi ýaqytta kúdikti aýrýhanada polıseılerdiń kúzetinde. QR Qylmystyq kodeksiniń 345-babynyń 4-bóligi boıynsha sotqa deıingi tergeý júrgizilýde, bul bapta 10 jylǵa deıingi merzimge bas bostandyǵynan aıyrý jazasy kózdelgen.

Qaza tapqan polısııa kapıtany Qanat Otarbaev ishki ister organdarynda 16 jyl qyzmet etken. О́ziniń qyzmettik mindetterin adal atqarǵany úshin 22 ret kótermelengen. Artynda jubaıy men úsh balasy qaldy, olardyń eń kishisi 3 jasta.

Qaza tapqan ekinshi polısııa kapıtany Qanat Hamıdýllın ishki ister organdarynda 12 jyl qyzmet etken jáne osy ýaqyt ishinde 23 ret kótermelengen. Marqumnyń artynda júkti áıeli men jeti jasar uly qaldy.