Asqar Mamınniń Almatyǵa ne úshin kelgeni belgili boldy

Qazaqstannyń premer-mınıstri Asqar Mamın Almatyda Hyundai avtomobılderin qurastyrý zaýytynyń ashylý rásimine qatysty, dep habarlady mınıstrliktiń resmı saıty.

Telekópir formatynda ótken zaýyttyń ashylý saltanatyna Koreıa Respýblıkasynyń saýda, ındýstrııa jáne energetıka mınıstri Son Iýn Mo, Qazaqstan Respýblıkasynyń ındýstrııa jáne ınfraqurylymdyq damý mınıstri B. Atamqulov, «Hyundai Motor Company» prezıdenti Lı Von jáne «Astana Group» prezıdenti N.Smaǵulov qatysty.

Premer-mınıstr saıtynyń habarlaýynsha, zaýyt álemdik avtomobıl jasaýdyń zamanaýı tehnologııalary men ekologııalyq standarttar talaptaryn eskere otyryp salynǵan. Kásiporynnyń jobalyq qýattylyǵy birinshi kezeńde jylyna 30 myń birlikti, ekinshi kezeńde jylyna 45 myń birlikke deıin quraıdy. Investısııalardyń jalpy kólemi 28 mlrd teńgeden asady. Shektes salalardy eskere otyryp, 1000-nan astam jańa jumys oryndary quryldy. Aldaǵy ýaqytta avtokomponentter shyǵaratyn zaýyt ashý kózdelgen, bul 51%-dan astam jergiliktendirýdi qamtamasyz etýge jáne TMD elderine eksportqa shyǵýǵa múmkindik beredi.

– 2020 jyldyń 9 aıynda avtomobıl jasaý salasyndaǵy óndiris kólemi 50%-dan astamǵa ulǵaıdy. Bul sala joǵary bilikti jumys oryndaryn ashýǵa jáne qosylǵan quny joǵary ónim shyǵarýǵa múmkindik beredi, – dedi Mamın.

Jumys sapary aıasynda Úkimet basshysy Almaty qalasyndaǵy JEO-2 aralap, onda elektr stansııasyn jańǵyrtý jáne gazǵa aýystyrý tujyrymdamasymen tanysty.

Ile Alataýy memlekettik ulttyq tabıǵı parkinde Premer-Mınıstrge Qazaqstanda ekologııalyq týrızmdi damytý jobalary tanystyryldy.