Baýyrjan Baıbek Aqtaýǵa bardy

«Nur Otan» partııasy Tóraǵasynyń birinshi orynbasary Baýyrjan Baıbek óńirlerge sapary barysynda Aqtaý qalasynda boldy. Ol munda aldymen oblystyq onkologııalyq ortalyqtyń jańa ǵımaratyn araldy. Qurylysy 2008 jyldan beri sozylyp kele jatqan bul ortalyq partııa Tóraǵasy birinshi orynbasarynyń byltyr shilde aıyndaǵy saparynan soń partııalyq baqylaýǵa alynǵan bolatyn.

«Zamanaýı dıagnostıkalyq keshenniń paıdalanýǵa berilýi qaterli isik aýrýlaryn bastapqy satysynda anyqtaý men emdeýdiń tıimdiligin arttyrady. Jergilikti bıliktiń málimetinshe, qajetti jabdyqtardy jetkizý taıaý ýaqytta aıaqtalady. Ortalyq ujymymen kezdesip, jaýapty jumystaryna tabys tiledim», - dep jazdy Býyrjan Baıbek Facebook jelisindegi paraqshasynda.

Budan soń partııa Tóraǵasynyń birinshi orynbasary óńirdegi partııaishilik praıremızge qatysýshylarmen, sondaı-aq jurtshylyqpen jáne úkimettik emes uıym ókilderimen kezdesti. Bas qosýda partııanyń oblystyq saılaýaldy baǵdarlamasyn talqylady, onymen primaries.kz saıtynan tolyǵyraq tanysýǵa bolady.
«Halyq únine qulaq asatyn memleket» tujyrymdamasy aıasynda bul qujatqa turǵyndardyń usynystary engiziledi. Máselen, Mańǵystaý oblysy boıynsha 770-teı usynys jınalyp, olardyń 411-i baǵdarlama jobasyna kirgizildi.

Memleket basshysy Q.K. Toqaevtyń el halqyna Joldaýynda aıtylǵan aýyl sharýashylyǵyna ozyq tehnologııalardy endirý jónindegi tapsyrmasyn eskerip, «QazAzot» kásipornyna bardym. Bul – qazaqstandyq aýyl sharýashylyǵymen aınalysýshylar mıneraldy tyńaıtqysh retinde keńinen paıdalanatyn ammıak pen amııak selıtrasyn óndiretin elimizdegi jalǵyz kásiporyn.

Aqtaýdyń ónerkásiptik áleýetin arttyrý jáne jańa jumys oryndaryn ashý úshin zaýytty jobalyq qýattylyǵyn jylyna 400 myń tonna mıneraldy tyńaıtqysh óndirýge deıin ulǵaıta otyryp modernızasııalaý josparlanýda.

Elbasy bastamashylyq etken respýblıkalyq «BizBirgemiz» aksııasyna qatysqandary úshin kásiporyn ujymyna alǵys aıttym. Pandemııa kezinde QazAzot qyzmetkerleri oblystaǵy aýrýhanalar men stasıonarlarǵa kıslorod ballondaryn óteýsiz toltyryp berýdi qamtamasyz etken bolatyn.

Sondaı-aq, Elbasy, partııa Lıderi N.Á.Nazarbaevtyń 5-shi kezeń aıasynda Aqtaý jáne Jańaózen qalalaryndaǵy 6 myńnan astam muqtaj otbasyǵa qarjylyq qoldaý kórsetý jónindegi tapsyrmasynyń oryndalý barysyn tekserdim. Osy tólemderdi qosqanda jyl ishinde Mańǵystaý oblysynda 28 myńnan astam otbasy 50 myń teńgeden aldy, bulardyń qatarynda qart adamdar, erekshe qajettiligi bar azamattar jáne basqalary bar», - dedi B.Baıbek.