Qoǵamdyq qor buryn isti bolǵan jannyń otbasyna qaıyrymdylyq kómek kórsetti

Qoǵamda jańylysyp jaza basqan jandardyń sany az emes. Sondaı adamdardyń biri – Almaty qalasy Naýryzbaı aýdanynyń turǵyny Gúlnur (О́z suraýy boıynsha esimi ózgertilip jazyldy). Qazir ol bes balanyń anasy. Qala shetinde ýaqytsha baspana jaldap turady. Birneshe jerde qara jumys istegenimen tapqan-taıanǵany bala-shaǵasyn asyraýǵa jete bermeıdi. Gúlnur aýdandyq probasııa bóliminde esepte turǵandyqtan, oǵan qylmystyq-atqarý júıesi tarapynan jıi kóńil bólinedi.

Osy aptada Naýryzbaı aýdandyq probasııa bóliminiń aǵa ınspektory Zamır Beısenbetov, ınspektor Názıra Abserova, «Máńgilik Qazaqstan» qoǵamdyq qory dırektorynyń mindetin atqarýshy Beıbit Nálibaev Gúlnurdyń januıasyna at basyn buryp, olarǵa azyq-túlik qorjynyn tabys etti. Qonaqtardyń qaıyrymdylyq tartýyn qabyl alǵan shańyraq ıesi óz rızashylyq bildirip, «Oramal ton bolmasa da, jol bolady» degen. Osyndaı kómekter bizdiń turmysymyzdy áldeqaıda jeńildetedi. Bizdiń bir aılyq shyǵynymyzdyń ornyn toltyryp otyrsyzdar. Rahmet siderge» dep alǵysyn bildirdi. Al aǵa ınspektor Z.Beısenbetov áleýmettik kómekke muqtaj jandardyń aýdanda áli de barshylyq ekenin jasyrmady. «Buryn sotty bolǵan adamdardyń jumys tabýy qıyn. Olardy jumys berýshiler ońaılyqpen jumysqa qabyldaı qoımaıdy. Sol sebepti olar ártúrli qara jumystardy istep kúneltedi» deıdi ol. Al qor jetekshisi Beıbit Nálibaevtyń sózinshe qaıyrymdylyq kómek Almaty qalasy Qoǵamdyq damý basqarmasynyń qoldaýymen iske asyp jatyr. «Basqarma túrmede jazasyn ótep jatqan jáne bas bostandyǵynan aıyrý oryndarynan shyqqan azamattarǵa arnalǵan jobany júzege asyrýdy bıyl bizge júktedi. Osy joba aıasynda psıhoáleýmettik baǵdarlamalardy uıymdastyrý degen pýnkt bar. Qaıyrymdylyq kómek osynyń aıasynda kórsetilip otyr» deıdi jobanyń basy qasynda júrgen B.Nálibaev.

Esterińizge sala keteıik, «Máńgilik Qazaqstan» qoǵamdyq qory Túrkisib aýdandyq probasııa bóliminiń esebinde turǵan azamattarǵa da qaıyrymdyq kómekter kórsetkenin jarııalaǵanbyz.