Taýly Karabahta atys toqtatylady. Taraptar qandaı kelisimge keldi?

Kelisim Máskeýde Armenııa men Ázerbaıjan elderiniń syrtqy ister mınıstrleri Zograb Mnasakanıan men Djeıhýn Baıram kelissózderiniń qorytyndysy negizinde jasalǵan.

Taraptar Reseıdiń syrtqy ister mınıstri Sergeı Lavrovtyń bastamashyl bolýymen jabyq formatta júzdesken. Kezdesý on saǵattan astam ýaqytqa sozylyp, senbide tańǵa jýyq aıaqtaldy.

Kelissóz nátıjesi boıynsha taraptar tómendegideı kelisimge keldi:

1) 2020 jyldyń 10 qazany saǵat 12:00-den bastap gýmanıtarlyq maqsatta atys toqtatylyp, tutqyndaǵy áskerıler men ózge azamattar, qaza tapqandardyń denesi halyqaralyq qyzyl krest krıterııleri boıynsha almastyrylady;

2) Atysty toqtatýdyń naqty qadamdary qosymsha kelisiledi;

3) Ázerbaıjan respýblıkasy men Armenııa Respýblıkasy Eýropadaǵy qaýipsizdik yntymaqtastyq uıymy Mınsk toby teńtóraǵalarynyń yqpalymen jaǵdaıdy retteýdiń bazalyq prınsıpteri boıynsha beıbit retteýge jol jetkizý maqsatymen sýbstantıv kelissózderge kirisedi;

4) Taraptar prosess kelissózi formatynyń ózgertilmeýine kelisedi.

Taýly Karabaqtaǵy qaqtyǵys 27 qyrkúıekte bastalǵan. Taraptar janjaldyń bastalý sebebin bir-birinen kóredi. Armıan jáne ázerbaıjan kúshteri arasyndaǵy urys birneshe frontta júrdi. Urysta drondar, artıllerııa, aýyr tehnıka men raketalyq keshender qoldanyldy. Eki jaqtan da beıbit turǵyndar opat bolǵan.