Nur-Sultanda mas júrgizýshisi adamdy qaǵyp óltirdi

Nur-Sultanda mas júrgizýshi jaıaý júrginshini qaǵyp, oqıǵa ornynan qashyp ketti. Bul týraly, ktk.kz habarlady.

Nur-Sultan qalalyq polısııa departamenti baspasóz qyzmetiniń málimetinshe, 6 qazan saǵat 21:19-da ZAZ Chance markaly kóligin tizgindegen mas júrgizýshi Kekilbaev kóshesimen kele jatyp Qaısenov kóshesiniń qıylysynda baǵdarshamǵa nazar aýdarmaı, jaıaý júrginshini qaǵyp ketti.  28 jastaǵy er adam baǵdarshamnan ótýge ruqsat berilgennen keıin jaıaý júrginshiler jolymen ótip bara jatqan. Jaıaý júrginshi alǵan jaraqat saldarynan oqıǵa ornynda kóz jumdy. 

Oqıǵa ornynan qashyp ketken kúdikti saǵat 21:22-de qıylysta turǵan Lexus markaly kóligimen soqtyǵysqan. Mas júrgizýshi kóligin tastap, oqıǵa ornynan jaıaý qashyp ketken. 

Leksýste otyrǵan aıaǵy aýyr jolaýshy aýrýhana jetkizilip, dárigerlerdiń qaraýynan keıin úıine jiberildi. Artynsha polıseıler 23 jastaǵy júrgizýshini ustady. 

Qazir tergeý júrip jatyr. Júrgizýshi ýaqytsha ustaý ızolıatoryna qamaldy.