Biryńǵaı jınaqtaýshy zeınetaqy qory qazaqstandyqtardyń qansha qarajat jınaǵanyn jarııalady

Biryńǵaı jınaqtaýshy zeınetaqy qory qazaqstandyq salymshylardyń 2020 jyldyń 1 qyrkúıegine deıin qansha qarajat jınaǵanyn jarııalady.

Prezıdent Toqaev jýyrdaǵy joldaýynda 2021 jyly BJZQ salymshylary óz zeınetaqy jınaqtarynyń bir bóligin turǵyn úı satyp alýǵa, emdelýge jáne qarjy kompanııalarynyń basqarýyna berý úshin ala alatynyy týraly aıtqan.

Osyǵan baılanysty jyl sońyna deıin barlyq qajetti normatıvtik-quqyqtyq aktilerdi túpkilikti qabyldaý úshin daıyndyq jumysy júrgizilýde.

Biryńǵaı jınaqtaýshy zeınetaqy qorynyń málimetinshe, 10 870 610 adamnyń shotynda zeınetaqy jınaǵy bar. Salymshylardyń 5 615 939-y er, 5 254 671-i áıel adam. Olardyń jalpy jınaǵy 11 trıllıon 942 mıllıard 813 mıllıon teńgege jetken, onyń ishinde 7 trıllıon 40 mıllıard 32 mıllıon teńge er azamattarǵa, al 4 trıllıon 902 mıllıard 781 mıllıon teńge áıelderge tıesili.

• 5 906 632 adamnyń 500 myń teńgege deıingi jınaǵy bar;
• 1 590 837 adam 501 myń teńgeden 1 mıllıon teńgege deıin qarajat jınaǵan;
• 2 348 114 adam 1 mıllıon teńgeden 3 mıllıon teńgege deıin;
• 634 188 adam 3 mıllıonnan 5 mıllıon teńgege deıin jınaǵan;
• 238 931 adamnyń 5 mıllıonnan 8 mıllıon teńgege deıingi salym bar;
• 151 908 adam 8 mıllıon teńgeden joǵary zeınetaqy jınaǵyna ıe.

Bul rette erlerdiń zeınetaqy jınaqtarynyń ortasha somasy – 1 mıllıon 254 myń teńge, al áıelderde – 933 myń teńge.  

Alaıda búkil jınaqtaýshy zeınetaqy júıesi qoldanysta bolǵan kezeń ishinde jarnalardy turaqty túrde aýdaryp otyrǵan adamdardyń zeınetaqy jınaqtaryn baǵalaıtyn bolsaq, onda 1998 jyldan beri zeınetaqy jarnalaryn aı saıyn aýdaryp otyrǵan salymshylardyń arasynda er azamattardyń jınaqtarynyń ortasha somasy 5,8 mln teńge, al áıelderde 4,4 mln teńge.