Túrkııadan ottegi konsentratory ákelindi

Almaty oblysynda kásipker Dáýlet Tóleýtaıdyń bastamasymen Túrkııa elinen Qazaqstanǵa eki júzden astam kıslorodty konsentratorlar ákelindi.

Kúlli Qazaqstanǵa tanymal azamat, jas bolsa da bas bola bilgen isker jan, búginde qaıyrymdylyq baǵytynda eleýli jetistikterdiń shyńynan kórinip júrgen Dáýlet Tóleýtaı «Dáýletten» qaıyrymdylyq qory arqyly dúıim respýblıka aýmaǵyna kómek qolyn sozý úshin halyqqa úndeý tastap, qarjy jınaǵan edi.

Abzal azamattyń bastamasymen Túrkııa elinen Qazaqstanǵa eki júzden astam kıslorodty konsentratorlar ákelingen bolatyn. Bir aıta keterligi, bul qaıyrymdylyq qozǵalysynan aýdanymyz da qur qalmaı, ortalyq aýrýhanaǵa qor atynan 1 dana tabystaldy. Qazirgi jaǵdaıda, bul qural ár aýrýhanaǵa óte qajetti bolyp sanalady. Sondyqtan da aýdan halqy atynan atalǵan qorǵa sheksiz rızashylyǵymyzdy aıtamyz.

Elde dári-dármektiń jetispeı jatqan soń ár óńirlerdegi belsendiler áleýmettik jelilerde paraqshalar ashyp, artylǵan dáriler týraly aqparat berip, turǵyndar arasynda úlestirýge kiristi. El arasynda shetelden dári-dármek pen qajet quraldar aldyrtýǵa septigin tıgizip jatqan mesenattar qatary jetip artylady.

Áıteke Bı: «Baqyt degen qus, taq degen tús, baılyq degen muz. Máńgilik qalatyn qaıyrymdy adal is», – depti. Tirshilikte tiri júrgen kisiniń jamandyqtan buryn jaqsylyq jasaýdy ǵana oılap, urlyq-qarlyq emes, qolynan kelgenshe qoǵamǵa paıda keltirgeninen asqan baqyt joq. Elim degen azamattardyń ıgi isi kópke úlgi. Jany jomart jandarǵa halyqtyń rızashylyǵy sheksiz.