“Bizde qarsylas joq”. Jeltoqsanshylar partııa qurmaq

11 qyrkúıek kúni Almaty qalasynda jeltoqsanshylar partııa quratynyn málimdep, quryltaı ótkizdi. Olardyń aıtýynsha, pandemııaǵa baılanysty qoldaýshylary túgel kele almaǵan.

– Bul partııa egemendik alǵanǵa deıin qurylǵan. Alǵash 1994 jyly "Alash jeltoqsan" ulttyq partııasy dep Ádilet mınıstrligine barǵanymyzda, "ulttyq" degen dúnıeni alyp tastańyzdar dedi. Biz oǵan kelispedik. Keıin elbasy Nursultan Nazarbaev ulttyq ataýyna kóńil bóle bastady.

Bizdiń jeltoqsanshylar – Alash babalarymyzdyń amanatyn oryndaýshylar, qazaq eliniń kók baıraǵyn kótergender. Búgingi kúnde urpaǵymyzǵa jeltoqsannyń tarıhyn jetkizý úshin "Alash jeltoqsan" ulttyq partııasyn qurmaqpyz.
Bizde qarsylas joq. О́ıtkeni Jeltoqsannyń óziniń “qazaǵym, urpaǵym, tilim” degen ıdeıasy bar. Qazir qurylyp jatqan partııalardyń kóp bolǵanyn qalaımyz,  – deıdi bastamashyl toptyń jetekshisi Gúlbahram Júnis.

Bastamashyl toptyń músheleri barlyq qalada fılıaly bar ekenin, partııany tirkeýge mindetti 20 myń músheni jınaı alatynyn aıtty.

Bastamashyl top zańgeri Aıbolat Jumabaı partııany tirkeýge zań boıynsha qandaı jumystar júrgizilip jatqanyn habarlady. 

– Bıylǵy jyly bizdiń saıası partııa týraly zańǵa ózgerister men tolyqtyrýlar engizildi. Bizge bul qolaıly bolyp tur. Buryn birqatar problema boldy. Onyń biri – 40 myń adamnyǵ qolynyń talap etilýi. Ony qazir eki ese azaıtty.
1 qyrkúıekte prezıdentimiz saıası partııalardy qurýdy shynaıy qoldaıtynyn aıtty. Onyń ózi bizge kóp múmkindik berip otyr.

Bizdiki pozısııaly partııa emes. Bizdiń maqsat – egemendigimizdi nyǵaıtý, halyqtyń múddesin qorǵaý, – dedi zańger.

Zańgerdiń aıtýynsha, partııa qurǵaly jatqan jeltoqsanshylardyń aryzyn Ádilet mınıstrligi maquldap, sezdge ázirlenýge ruqsat etken.

Jıynda bastamashyl top múshelerine kýálik tabystaldy.

– Jańa saıası partııa qurý jaıly yntaly toptardyń áreketi, ókinishke qaraı, bılik tarapynan zańdy-zańsyz shekteýlerdiń negizinde múmkin bolmaı jatyr. Qazaqstanda qazirde aldymyzda kele jatqan saıası naýqan máslıhat jáne májilis saılaýy aldynda partııa tirkeýge, qurýǵa, partııa sharalaryn júrgizýge ýaqyt shekteýli. Biraq bul bolashaǵy bar is, – dedi JSDP partııasynyń Almatydaǵy tóraǵasy Tazabek Sámbetbaı.