Derbes kompıýterler tabystaldy

Jańa oqý jyly qashyqtan oqytý rejıminde bastaldy. Biraq, shalǵaı aýyldarda turatyn keıbir otbasylardyń úıinde ınternet turmaq kompıýter de joq. Osyǵan oraı, oblysymyzda áleýmettik az qamtylǵan otbasylardyń balalaryna qashyqtan oqýǵa jaǵdaı jasaý maqsatynda 55 myńnan astam derbes kompıýter satyp alynady.

Tehnıkalyq quraldardyń alǵashqy bóligi Taldyqorǵan qalasyndaǵy Polıtehnıkalyq kolledjine jetkizildi. Respýblıkalyq bıýdjetten bólingen derbes kompıýterlerdi arnaıy qurylǵan komıssııa músheleri qabyldap aldy.

Shara barysynda oblystyq bilim basqarmasynyń basshysy Maıgúl Omarova:

– Qashyqtyqtan bilim alý ýaqyt talaby. Dese de biz az qamtylǵan otbasylardy oılaýymyz kerek. Sondyqtan birinshi kezekte kompıýterler ár aýdan-qalalardaǵy az qamtylǵan otbasylarǵa beriledi. Kompıýterlerdi kezeń-kezeńimen jetkizý jumystary jalǵasyp jatyr. Búgin alǵashqy bóligin aldyq. Búldirshinderimizge, bolashaq bilimdi jastarǵa barlyq jaǵdaı jasalyp jatqanyna shyn júrekten qýanyshtymyz! Qajetti tehnıka barlyq aýdan-qalalarǵa beriletin bolady, – dedi.

Kompıýter, noýtbýk jáne planshet sııaqty qajetti tehnıkalar satyp alýǵa respýblıkalyq bıýdjetten 8,6 mlrd. teńgeden astam qarjy bólingen. Aıta keteıik bul tehnıkalar otandyq «ATEKA» kompanııasynan alyndy. Bul kompterlerdiń ereksheligi – «WI-FI» adapterleri bar. Iаǵnı, endi oqýshalarǵa ınternet tapshy emes. Tehnıkalyq quraldardyń alǵashqy bóligi Aqsý, Qaratal aýdandary men Taldyqorǵan qalasynyń oqýshylaryna berildi. Aldaǵy aptada tehnıkalyq qurylǵylardyń taǵy bir bóligi keledi dep josparlanýda.