Álemdegi eń alda kele jatqan koronavırýs vaksınasy adamǵa keri áser berip, toqtatyldy

AstraZeneca jáne Oksford ýnıversıteti ázirlegen koronavırýstyq vaksınanyń sońǵy klınıkalyq synaqtary qatysýshynyń keri reaksııasynan keıin toqtatyldy. AstraZeneca ony "túsiniksiz aýrý" jaǵdaıyndaǵy "ádettegi" kidiris dep sıpattady.

Vaksına synaqtarynyń nátıjesi búkil álemde muqııat baqylanady. AstraZeneca-Oxford University vaksınasy álemde damyp kele jatqan ondaǵan vaksınalardyń arasynda myqty básekeles retinde qarastyrylady.

Vaksına naryqta alǵashqylardyń biri bolyp, synaqtyń 1 jáne 2 kezeńderinen sátti ótken. Sońǵy aptalarda 3-shi kezeń synaǵyna 30,000 adam qatysqan. Qatysýshylar AQSh, Ulybrıtanııa, Brazılııa jáne Ońtústik Afrıka turǵyndary. BBC aqparatyna sáıkes, vaksınalardyń 3-shi kezeńindegi synaqtar kóbinese myńdaǵan qatysýshylardy qamtıdy jáne birneshe jylǵa sozylýy múmkin.

DDSU ne deıdi?

Dúnıejúzilik densaýlyq saqtaý uıymy (DDSU) "vaksınanyń 180-ge jýyq úmitkeri búkil álemde synaqtan ótip jatyr, biraq olardyń eshqaısysy klınıkalyq synaqtardy áli aıaqtaǵan joq" deıdi.

Uıym bıyl vaksına tıimdiligi men qaýipsizdigi boıynsha nusqaýlyqqa sáıkes keledi dep kútpeıdi, óıtkeni olardy qaýipsiz tekserýge ýaqyt ketedi.

Halyqaralyq farmasevtıkalyq óndirýshiler federasııasynyń bas dırektory Tomas Kýenı de osyndaı pikirler aıtty. 

Qytaı men Reseıdiń vaksınasy qaı kezeńde? 

Osyǵan qaramastan, Qytaı men Reseı keıbir negizgi jumysshylarǵa otandyq vaksınalardy egýdi bastap ketken. Olardyń barlyǵy DDSU tiziminde klınıkalyq zertteýlerge jatqyzylǵan.

Buǵan deıin DDSU 7 ınstıtýt vaksınany synaýdyń sońǵy kezeńine jetkenin jarııalaǵan. Sońǵy kezeńge jetken vaksınalardy daıyndaǵan elder qatarynda Qytaı (4 ınstıtýt), AQSh (1 ınstıtýt), Ulybrıtanııa (1 ınstıtýt) jáne Avstralııa (1 ınstıtýt) bar ekendigi habarlanǵan. DDSU Reseıdiń koronavırýs vaksınalary ózge vaksınalardan edaýir artta qalǵany jaıynda eskertken. Tipti DDSU Reseı vaksınasynan saq bolýǵa shaqyryp, osy ýaqytqa deıin Reseıde ekinshi nemese úshinshi kezeń synaqtary tirkelmegenin málimdegen.