ShQO-da qashyqtyqtan oqytý maqsatynda qosymsha 36 myń kompıýter satyp alynady

Qashyqtyqtan oqytý barysynda bala men pedagogte kompıýter bolýy tıis. Shyǵys Qazaqstanda oqýshylar men oblys mektepteriniń muǵalimderin kompıýtermen qamtamasyz etý maqsatynda saraptama jasalyndy.

Tikeleı efır barysynda ShQO ákimi Danıal Ahmetov óńirdegi mektepterde 33 200 kompıýter bar ekenin atap ótti. Al oqýshylardyń 88 paıyzy úı jaǵdaıynda kompıýtermen qamtamasyz etilgen. 22,4 myń balanyń onlaın rejımde bilim alýyna tehnıkalyq jaǵdaı jasalmaǵan. Sondyqtan 17 myńnan astam oqýshy, eń aldymen áleýmettik jaǵynan az qamtylǵan otbasylarda tárbıelenip jatqan balalarǵa mektepterdegi kompıýterler beriledi. Keıin olar kompıýterdi mektepke qaıtaryp berýi tıis. Sondaı-aq 197 pedagog qajetti tehnıkamen qamtamasyz etiledi.

–        Mektep jasyndaǵy birneshe bala men ata-anasy qashyqtyqtan jumys istep otyrǵan balalar bar. Olardyń deni bir kompıýterdi qoldanady. Atalǵan máselee mektep ákimshiliginde talqylanady. 25 tamyzǵa deıin oblys mektepterine qosymsha 9,5 myń birlik kompıýter satyp alamyz. Sonymen qatar ókimettik qordan 26,5 myń birlik tehnıka alýǵa qarajat bólý qarastyrylyp otyr. Bul qarjy kózi balalar men pedagogterge qajetti tehnıkany áperýge jetkilikti, - dedi Danıal Ahmetov.

Internet máselesi de sheshimin tabady. Búgingi kúni 189 myń oqýshynyń 18,3 myńy ınternetpen qamtamasyz etilmegen. Osy máseleni sheshý úshin balalarǵa SIM kartalar men tarıfter qosylǵan joǵary jyldamdyǵy bar 5 620 roýter beriledi. Qalǵan 6 877 bala shtattyq rejımde bilim alatyn bolady.

Budan bólek, mektep jasyndaǵy balalar turatyn barlyq eldi mekende ınternet jelisiniń jyldamdyǵy artatyn bolady. Aımaq basshysynyń aıtýynsha, 2020 jyldyń 1 qyrkúıegine deıin 52 eldi mekendegi ınternet jelisi jyldamdyǵyn joǵarylatady.