О́ŃIRDIŃ О́NDIRIS MEKEMELERI PANDEMIIаMEN KÚRESTE QOLDAÝ KО́RSETÝDE

О́ńirde koronavırýstyq ınfeksııa indetiniń taralýy bastalǵaly oǵan qarsy kúreste óndiris mekemeleri qol ushyn berip keledi. «Ersaı» kompanııasy da el úshin qıyn sátte qarap qalmady. Sáýir aıynda kompanııa Qaraqııa aýdandyq aýrýhanaǵa teplovızorlar, jeke qorǵanysh kıimderi men dári-dármekter tabys etti. Sondaı aq, jýyrda Mańǵystaý oblystyq jáne Qaraqııa aýdandyq aýrýhanalaryna barlyǵy 6 ottegi konsentratory, 2 EKG apparaty, 130 pýlsoksımetr, 10 ottegi jastyqshasy, 900 qorǵanysh kıimder, 7500 medısınalyq qolǵaptar, 1800 bir rettik medısınalyq betperdeler, 1500 KN95 respırator jetkizdi. Sondaı-aq, koronavırýs pen pnevmonııany emdeýge qajetti 17 túrli dáriden barlyǵy 9245 dana dári - dármek berildi.

Tapsyrylǵan medısınalyq zattar koronavırýs pen pnevmonııanyń asqynǵan túrimen aýyratyn naýqastar úshin birinshi qajettilikter. «Bul biz úshin úlken qoldaý, sebebi ákelingen medısınalyq qurylǵylar men dári-dármekter kez kelgen ýaqytta naýqas azamattardyń ómirin saqtap qala alady» - dedi Qaraqııa aýdandyq ortalyq aýrýhananyń bas dárigeri Gúlshara Begnııaz.
Sonymen qatar, «Ersaı» kompanııasy bıznestiń áleýmettik jaýapkershiligi aıasynda «Olımp» PTR test laboratorııasynyń qýattylyǵyn arttyrý maqsatynda qajetti avtomatty jabdyqty satyp alý úshin qarjylaı kómek kórsetý jóninde sheshim qabyldap, halyqtyń áleýmettik turǵydan osal toptaryn testileý úshin óteýsiz 10000 PTR test synamasyn berdi. Kompanııa ókili B.Chınıaev aldaǵy ýaqytta da indetpen kúresýde óńir turǵyndary men medısınalyq mekemelerge kómek kórsetýdi jalǵastyratynyn jetkizdi.