30 Shilde, 2020 Almaty oblysy

Qaıyrymdylyq estafetasy: Aıadaı aýyldyń úlken kómegi

Foto avtordiki

Jetimin jylatpaǵan, jesirin qańǵyrtpaǵan dana halqymyzda ultym dep týǵan atymtaı jomarttar jeterlik. Oǵan dálel, elimizde oryn alǵan tótenshe jaǵdaıda qınalǵan jandarǵa qol ushyn sozǵan Almaty oblysy Kóksý aýdany Aqtekshe aýylynyń  peıili darqan jandary.

Ultyn ulyqtap, saltyn ardaqtaǵan kishkentaı ǵana aýyldyń úlken jetistigi – halqynyń birligi. Elimizde tótenshe jaǵdaı oryn alǵan sátte-aq Aqtekshe aýylyndaǵy turǵyndar judyryqtaı jumyldy. 1970 jyly aýylda týǵan jandardyń muryndyq bolýymen  qaıyrymdylyq estafetasy bastaldy. Iаǵnı, ár jylǵy aýyl azamattary ózderiniń kezegi kelgen kezde qarjylaı aqsha jınap, áleýmettik jaǵynan tómen otbasylar men jetim-jesir, aýrý-syrqaýlarǵa, tosynnan járdemge zárý bolyp qalǵandarǵa kómek qolyn sozady. Jýyrda qaıyrly is qylýdan 1982 jyly týǵan jandardyń kezegi keldi. «Jomarttyq – jannyń baılyǵy» – dep jaqsylyq jasaýǵa jarysa umtylatyn olar elimizde COVID-19 indeti órship turǵandyqtan Kóksý aýdandyq aýrýhanasyna ottegi konsentratyn alyp berýdi jón sanaıdy. Árıne, indet órship turǵan zamanda qurylǵyny satyp alý ońaı emes. Sondyqtan olar «Shuǵyla» qoǵamdyq qory arqyly apparatty Qytaıdyń Gýanchjoý qalasynan aldyrtady. Sóıtip, jany meıirimge toly eriktiler aýrýhanaǵa ottegi konsentratyn tartý etip, basyn qaterge tigip, kúni-túni jumys istep júrgen dárigerlerge alǵysyn bildirdi.

Shara barysynda Aqtekshe aýylynyń týmasy Aınagúl Quttybekova:

 – Jasandy tynys alý apparatyn Gýanjoý qalasyna jetkizip bergen «Shuǵyla» qoǵamdyq qoryna alǵysymyzdy bildiremiz. Bizdiń maqsat – bir adamǵa bolsa da kómektesý. Dana halqymyzdyń: «Birlik bar jerde tirlik bar», – degen keremet támsili búgingi kúnge arnalǵandaı. Osy bir syn saǵatta birigip, bir jeńnen qol, bir jaǵadan bas shyǵarýymyz kerek. Barlyq qaltaly jandar qolynan kelgenshe kómektesse, bul indetti de eńseremiz. Álemdi jaılaǵan indet óńirimizde odan ári órshimeý úshin medısına qyzmetkerleri qıyn jaǵdaıda jumys isteýde. Tipti, ózderi de aýyryp jatyr. Biz de qolda barymyzdy aıamaı, kómekteseıik. Qaıtarymsyz qaıyrymdylyq jasaýdan qol úzbeıik, – dedi.

Osydan keıin atalmysh aýyl perzenti Bolat Kerimbekov: «Memleket basshysy Qasym-Jomar Toqaevtyń bastamasymen qolǵa alynǵan «Biz birgemiz!» aksııasy sheńberinde mesenattar, kásipkerler men belsendi azamattardyń qoldaýynyń arqasynda elimizdiń barlyq aımaqtarynda otbasyǵa, onyń ishinde jalǵyzbasty qarttarǵa, erekshe qajettiligi bar jáne t.b. azamattarǵa kómek kórsetilýde. Máselen, Aqyn Qaban jyraý atyndaǵy mekteptiń ár jylǵy túlekteri aýylymyzdyń áleýmettik jaǵdaıy tómen otbasylaryna, kómekke muqtaj azamattarǵa qol ushyn sozdy. Olar azyq-túlikpen, mal-múlikten, qarjylaı kómektesýde. Osyndaı saýapty isti qoldaýshy aýyl azamattaryna ryzashylyǵymdy bildirgim keledi», – dep áli de qoldan kelgen kómekterin aıanyp qalmaıtyndyǵyn aıtyp, jurtshylyqty judyryqtaı jumylyp ıgi is jasaýǵa shaqyrdy.

Jıyn barysynda aýdandyq aýrýha dırektorynyń orynbasary Zylıha Qańlybaıqyzy eldiń erteńi úshin alańdap,  qural-jabdyqtardy aýrýhanaǵa jetkizip bergen eriktilerge  alǵysyn bildirdi.

– Janashyr jandar naýqastarǵa úlken kómek kórsetip jatyr. Bul apparattar mundaǵy naýqastarǵa úlken kómek boldy. Sol úshin osyndaı ıgi is jasaǵan azamattarǵa alǵysymyzdy aıtamyz, – dedi ol.

Qaıyrymsyz qaıyrymdylyq jasap, birikken aýyl azamattarynyń bul isi kópke úlgi. Ultym degen ul-qyzdardyń aýyrǵan naýqastarǵa demeý bolǵany, eliniń janashyry bolǵany erlikpen para-par. Meıirimdi jannyń barlyǵy qosyla bir mezette jumylyp kúresse, bul indetten de arylatynymyz anyq.

Aıdar QALIEV

Almaty oblysy

Ilmek sózder: Almaty oblysy

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir