27 Shilde, 2020 Suhbat

"Karantınde 600 myń teńge taptym". "Glovo" kýreriniń áńgimesi

Sýrette Erjan Qypshaqbaev

Erjan Qypshaqbaev – Qyzylorda oblysy Aral qalasynyń týmasy. Jasy 25-te. Osy ýaqytqa deıin ár jumystyń basyn shalǵan ol qazir Almatyda "Glovo" jetkizý servısiniń seriktesi, ıaǵnı kýrer bolyp jumys isteıdi.

Sýrette Erjan Qypshaqbaev

Erjan 9-synypty bitirgen soń Aqtóbe qalasyna oqýǵa tústi. Tórt jyl kolledjde oqydy. Ony támamdaǵan soń Almatydaǵy Qazaq bas sáýlet-qurylys akademııasynyń stýdenti atandy. Alaıda qyzyǵýshylyǵy bolmaı, oqýdy orta joldan tastap ketken.

 

– Qazaq bas sáýlet-qurylys akademııasynda sáýletshi mamandyǵynyń aqyly bóliminde oqydym. Jalpy ózim unatqan dúnıemen aınalysýǵa tyrysamyn. Sonda isti bar yntamen jasaısyń. Akademııadaǵy oqý ýaqyt óte jalyqtyra bastady. Jalǵastyrýǵa yntam bolmaı, 1-kýrstan keıin oqýdan shyǵyp kettim. Munyma oqytýshylarym tańyrqaı qarady. О́ıtkeni men toptaǵy jaqsy oqıtyn stýdentterdiń biri edim, – deıdi ol.

Oqýdan shyǵyp qalǵan Erjan kezdesken kez kelgen jumysty istegen. О́ziniń sózinshe, jumys talǵamaıdy.

– Osyǵan deıin meıramhanalarda daıashy boldym. KFS-de istedim. Qurylysqa aralasqan kezder de bar. Eshqandaı jumystan qashpaımyn, kerisinshe aldymnan shyqqan tirliktiń barlyǵyna istep kórgim keledi. Al Glovo-da istep jatqanyma 7-8 aı boldy. Bul jaqta aqshany kúndelikti berip otyrady. Sol jaǵy tıimdi. Basqa servısterdi tańdamaý sebebim de sol. Kúnine eń kóbi 11 saǵat isteýge bolady. Jumys kestesin óziń tańdaısyń. Men istep jatqan kompanııa bir jyldyń ishinde "Chocofood", "Iаndeks Eda" sekildi jetkizý servısterin basyp ozdy. Bul maqtanarlyqtaı dúnıe, – deıdi kýrer.

Qysta velosıpedpen tapsyrys jasap júrgen Erjan

Erjan áleýmettik jelide óte belsendi. О́ziniń jumysy men qyzyqty sátterin úzdiksiz Instagram paraqshasyna salyp otyrady. Kýrer qyzmetiniń qanshalyqty qyzyqty ekenin barlyǵy bilgenin qalaıdy.

 

– Qazir mende eki paraqsha bar. Birinshisine maǵynaly vıdeolardy, tárbıelik máni bar dúnıelerdi júktep otyramyn. Ekinshisi ózimniń jeke paraqsham. Ol jerde jumys týraly jazam. Nege ekenin kóp adam óziniń kýrer bolyp jumys isteıtinin ashyp aıta bermeıdi. Men "eger qandaı da bir jumysqa kiretin bolsam, Instagram jelisinde sol týraly aıtyp otyramyn" dep burynnan oılap júrtinmin. Áleýmettik jelide jumysyn kórsete otyryp tanymal bolyp ketken qasapshylar bar. Men de sol sekildi ózime qyzyq dúnıeni jelidegi paraqshamda bólisip otyramyn. Kýrerdiń jumysy qyzyqty ekenin basqalar da bilse deımin. Qysta tapsyrysty jaıaý oryndaıtynmyn. Tamaqty sýytyp almaý úshin tezirek júrýge týra keledi. Jumys barysynda kóptegen tanymal adamdarmen jolyǵamyz. Birde Sáken Maıǵazıev aǵamyzben kórisip qaldym. Ol kisi sondaı qarapaıym eken. Ekeýimiz biraz áńgimelestik. Men qandaı da bir belgili adamdy kórsem, birden sóılesip kóremin. Maǵan adammen aralasqan unaıdy. Bul áreketim úshin uıalmaımyn, – deıdi ol.

 

Keıipkerimizdiń Instagram paraqshasynan

Erjannyń sózinshe, karantın kezinde, eldiń bári úıde otyrǵanda jetkizýshilerdiń jumysy qyza túsken.

– Basynda jaıaý júrsem, artynan eki velosıped satyp aldym. Keıinirek mopedke kóshtim. Qazir sonymen jumys isteımin. Alǵashqy kezde eki aptada 60 myń teńge tapqanmyn. Keıin aldyma "odan da kóp tabam" degen maqsat qoıdym. Karantın kezinde barlyq kýrerler jaqsy aqsha tapty. Men de toqtamaı jumys istedim. Aıyna 500-600 myń teńge taptym. Qazir bul jumys meniń basty tabys kózime aınaldy Odan bólek moped maılaryn kóterme baǵamen alyp, satamyn. Buıyrtsa qarajat basyn biriktirip, kólik satyp almaq oı bar, – deıdi Qypshaqbaev.

Erjan jumys kezinde


Erjan Aralda júrgende qaıyrymdylyqpen aınalysyp, muqtaj jandarǵa qol ushyn sozǵan.

– Qyzylordada júrgenimde áleýmettik jeliden paraqsha ashyp, maǵynaly vıdeolar sala bastadym. Ýaǵyzdar, qanatty sózder degendeı. Keıinnen sol vıdeolardy bólisetin adamdardyń sany artyp, oqyrman jınala bastady. Qazir paraqshamda 100 myńdaı oqyrman bar. Aral qalasynda júrgenimde jaǵdaıy joq otbasylar paraqshama jazyp kómek suraıtyn. Muqtaj jandardyń úıine baryp, kómekke zárý ekenine kóz jetkizsek, oqyrmanmen birge qarajat jınap beretinbiz. Arys qalasynda jarylys bolǵan kezde de qoldan kelgenshe kómektesýge tyrystyq. Qazir paraqsha jumysy toqtap tur. Bar oıym jumysta bolǵan soń áleýmettik jelige qaraýǵa ýaqyt tapshy, – deıdi Erjan.

Qypshaqbaevtyń qaıyrylymdyq jasap júrgen kezi

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir