Koronavırýs: Qazaqstan dúnıejúzinde taǵy bir saty joǵarylady

О́tken táýlikte 1687 adamynan koronavırýs tabylǵan soń Qazaqstan COVID-19 juqtyrǵandar sany jóninen álem elderiniń arasynda bir saty joǵarylap, 28-orynǵa jaıǵasty. Sońǵy aqparatqa saı, elde vırýs juqtyrǵandar sany 78 myńnan asty. 

Statıstıkada Qazaqstannan bir saty joǵary turǵan Shvesııada da, bir saty tómen turǵan Ekvadorda da juqtyrǵandar sany shamalas – 78 myńnyń ústinde. 

Juqtyrǵandar sany jóninen de, ólim boıynsha da AQSh kósh bastap tur. Elde osy ýaqytqa deıin 4,2 mıllıonǵa jýyq adamnan koronavırýs anyqtalyp, olardyń 147 myńnan astamy kóz jumǵan. 

Koronavırýsqa baılanysty álem elderiniń statıstıkasyn jarııalap otyratyn Worldometers.info saıtynyń 24 shilde tańerteńgi deregi boıynsha, dúnıejúzinde 15,7 mıllıonǵa jýyq adamǵa COVID-19 juqqan. Osy ýaqytqa deıin olardyń 636 myńnan astamy kóz jumǵan.