"42500 tólenýi kerek". Qatań karantın týraly halyq ne deıdi?

Qazaqstanda koronavırýs juqtyrǵandar sany 41 myńnan asqan tusta bılik elde qaıtandan karantındi kúsheıtý týraly aıta bastady.  Jańadan taǵaıyndalǵan densaýlyq saqtaý mınıstri Alekseı Soı indetpen kúresýdiń 4 tásilin usyndy. Onyń sózinshe, koronavırýsqa qarsy kúresýdiń  eń tıimdi tásili: 4 aptalyq qatań karantın rejımi.

Al eki aıǵa jýyq Tótenshe jaǵdaı rejıminde, úsh aıǵa jýyq qatań karantınde kún kórgen halyq mınıstr usynǵan tásildi qoldaı ma? Almatylyq turǵyndardan sol týraly surap kórdik.

Qazaqstan bıligi elde koronavırýsqa baılanysty 2 aıǵa jýyq sozylǵan tótenshe jaǵdaı rejımin alyp tastap, qalalardy qaıta ashqan soń vırýs juqtyrǵandar sany kúrt kóbeıdi. Maýsym aıynyń basynan beri elde kúnine 1000-nan astam adamnan vırýs tabylyp júr. Sońǵy resmı aqparatqa sáıkes, elde 41 055 adamnan koronavırýs tabylǵan. Osy ýaqytqa deıin olardyń 13558-i aýrýynan jazyldy, al 188-i kóz jumdy.