• USD 412.55
  • EUR 465.73
  • RUB 5.79
  • CNY 58.91

26 Maýsym, 2020 NEWS

"Úıimiz máıit sasyp ketti": almatylyqtar týystaryn jerleı almaı otyr (vıdeo)

sputniknews.kz

Almatyda qaıtys bolǵan adamdardy týystary jerleı almaı otyr. Keı azamattar tipti aqymyna deıin qazyp qoıǵan. Alaıda sot saraptamalyq ınstıtýty ókilderi ólgen adamdardyń denesin bermegen. Bar gáp «koronovırýstan qaıtys bolmaǵan» degen anyqtamada eken. Bul týraly Eýrazııa birinshi arnasy habarlady.

Qalada saraptama ortalyqtary karantınge jabylyp qalypty. Atyraý, Shymkent, Almaty oblystaryna aparyp jerleýdi kózdep otyrǵan azamattar ólgen adamdardyń denesi buzylyp ketetin boldy dep dabyl qaǵýda. Iisi shyǵyp ketpeýi úshin eń bolmasa salqyn jerge jatqyza turaıyq dese, ortalyq máıithana marqumdardyń denesin qabyldaýdan bas tartypty.

Týystary qaıtys bolǵan azamattar Almaty qalasy boıynsha sot saraptamalyq ınstıtýtyna kelip, shý shyǵardy. Keı azamattardyń týystary úıinde qaıtys bolypty. Kúnniń ystyńynda denesi buzylyp barady, úıimiz ólik sasyp ketetin boldy dep dabyl qaǵýda.

«Keshe bizdiń 80 jastaǵy apamyz qaıtys boldy. Sarapshy kelip COVID-19 synama alyp máıitke eshkim jaqyndamasyn dep aıtty. Apamyzdyń denesi úıde. Endi eshqandaı salttyq qyzmet ókilderi de jolaı almaýda», deıdi  qala turǵyny Ekaterına Holıýchenko.

Turǵyndardyń keıbiri qaıtys bolǵan jaqyndarynyń denesin buzylyp ketpeý úshin sot saraptamalar ınstıtýtyna ótkizipti. Alaıda test qortyndysy shyqpaǵan soń máıitti de bermeı jatyr eken. Keı azamattar týǵan jerlerine de aparyp jerleýdi kózdeıdi. Aralarynda Atyraý, Shyǵys Qazaqstan oblysy, Shymkent, Taldyqorǵan qalasyna aparǵysy keletinder bar. Eger saraptama tezdetip júrgizilmese, ólgen adamnyń denesi buzylyp ketetin boldy dep ashynýda. Tipti jerin alyp, aqymyn qazyp ta qoıǵandar da bar.

«Eshqaıda bara almaı jatyrmyz jerleýge. Eshqandaı, eshkimnen kómek joq. Myna keshe kelip áreń ótkizdik. Eki kúnnen keıin. Sasyp ketti úıde. Endi sony ala almaı jatyrmyz. Analız kelmeı jatyr. Esh jer qabyldamaı jatyr», deıdi qala turǵyny Murat Qusaıynov.

Janat Imanbaeva, qala turǵyny:

«Aýyldyń týysqandary jerin qazyp, aqymyn qazyp kútip jatyr. Jerge tapsyratyn kúni negizi qazaqtardyń nesi boıynsha. Sol máıittiń ózin jetkizý 4 saǵat alady. Osy nemen osynda júrmiz. Keshe de adam kóp boldy. Búgin de ala almaı júr súıekterin».

Erbol Moldabaev, qala turǵyny:

«Dosymnyń kelinshegi qaıtys bolyp edi. Búgin úshinshi táýlik áli ala almaı otyrmyz ólikti. Biz Shymkentke Lengerge alyp ketýimiz kerek. Ýje 3 sýtka boldy anda bar, akımatqa bar deıdi. Barsań ár jaqqa jumsaı beredi. Bilmeımiz ne isterimizdi. Súıek naǵyp, buzylyp bara jatyr».

Máıitterden alynǵan bıo materıaldarǵa saraptama júrgizetin ulttyq saraptama ortalyǵynyń ózi karantıge jabylyp qalypty. Saraptama júrgizilmeıdi. Ári qaıǵyryp, ári anyqtama ala almaǵandar ortalyqqa baryp mardymdy jaýap ala almady. Sot saraptama ınstıtýtynyń mamandarynan suhbat alý múmkin bolmady.

Telefon arqyly áreń jaýap bergen ókilderi máıithanada onnan astam dene bar ekenin jetkizdi. Zertteý qortyndylary bolmaǵan soń denelerin bere almaı otyrmyz dep aqtaldy.

Jambyl Bekjanov, sot saraptamalar ortalyǵynyń ókili:

«Qazir bizdiń máıithanada 13 dene jatyr. Onyń ishinde 10 denede kovıd nátıjeleri joq. Zertteý sparavkalary bolmasa da biz qabyldaımyz. Qazirgi ýaqytta eń problemasy rezýltaty. Kovıd boıynsha zertteý. Ony densaýlyq saqtaý mınıstrligine qaraıtyn zerthanalar isteıdi». Ulttyq saraptama ortalyǵynyń ókilderi búgin elimizdiń bas memlekettik sanıtar dárigeri «aýrýhanadan tys jerde qaıtys bolǵan adamdardyń deneleri koronavırýs anyqtamasynsyz jerlenedi» degen qaýlyǵa qol qoıǵanyn jetkizdi. Alaıda sot saraptamalar ortalyqtaryna áli nusqaý berilmegen. Sondyqtan áli eshkimge týystarynyń máıiti berilmepti.

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir