Medeý aýdanynyń qandaı nysandary kelýshiler úshin jabyq bolady?

Almaty qalasy Medeý aýdany ákiminiń orynbasary Berik Soltanbaev Almaty qalasynyń óńirlik kommýnıkasııalar qyzmetiniń alańynda ótken onlaın baspasóz konferensııasynyń barysynda 20-21 maýsym jappaı dezınfeksııalaý kezinde qandaı nysandardyń qyzmeti toqtatylatynyn habarlady.

Eske sala keteıik, Qalalyq komıssııanyń koronavırýs ınfeksııasynyń taralýyn boldyrmaý boıynsha sheshimine baılanysty Almatyda 20-21 maýsym kúnderi qaladaǵy epıdemıologııalyq jaǵdaıdy turaqtandyrý úshin jappaı dezınfeksııalaý sharalary júrgiziledi.

– Medeý aýdanynda búgin jáne erteń barlyq oıyn-saýyq ortalyqtarynyń, saýda ortalyqtarynyń, saýda úıleriniń, bazarlardyń, sýpermarketterdiń, fıtnes-ortalyqtar men stadıondardyń qyzmeti toqtatylady. Sondaı-aq, saıabaqtar, skverler,býlvarlar, jaǵalaýlar men basqa da qoǵamdyq oryndarǵa da barýǵa bolmaıdy, – dep habarlaǵan Berik Soltanbaev Shymbulaq taýly kýrorty, Medeý bıik taýly muz aıdyny, Kóktóbe, Býtakovka osy kezeńde kelýshiler úshin jabyq bolatynyn atap ótti.

Medeý aýdanynyń aýmaǵynda 19 SOO, SO, SÚ, 2 bazar, 17 sýpermarket, 31 fıtnes ortalyq, 2 iri saıabaq jáne 20 skver bar. Barlyq kórsetilgen nysandarda dezınfeksııa júrgizý josparlanǵan. О́ńdeý júrgizý úshin adamdar men janýarlar úshin qaýiptiligi tómen zattardyń 4 klasyna jatatyn preparattar qoldanylady. Saýda nysandarynyń dezınfeksııasy olardyń jekemenshik ıelerimen júzege asyrylady.

Sondaı-aq, qoǵamdyq tamaqtanýdyń 380 nysany. Olardyń ishinde 118 jazǵy alańdar bar. Qoǵamdyq tamaqtaný nysandaryna tek tapsyryspen aldyrý arqyly jáne sanıtarlyq-epıdemıologııalyq normalar men áleýmettik qashyqtyqty saqtaý arqyly jazǵy alańdardyń jumys isteýine ruqsat etilgen.

SOO ornalasqan jeke esigi bar dámhanalar men meıramhanalar shtattyq rejımde jumys isteı alady.

Koronavırýstyq ınfeksııanyń taralýyna jol bermeý maqsatynda burynda Almaty qalasynyń ákimi Baqytjan Saǵyntaevtyń tapsyrmasy boıynsha qalanyń barlyq aýdandarynda sanıtarlyq-epıdemıologııalyq qaýipsizdik sharalaryn saqtaýdy baqylaý boıynsha monıtorıngtik toptar quryldy.

– Almaty qalasy ákiminiń tapsyrmasyna sáıkes, ár aýdanda monıtorıngtik toptar quryldy. Búgingi tańda Medeý aýdanynyń aýmaǵynda 300-den astam nysan tekserildi. Onyń ishinde 114 nysan tártip buzýshylyqty qalpyna keltirgenge deıin jabyldy, – dep tolyqtyrdy Berik Soltanbaev.

Medeý aýdany ákiminiń orynbasary dezınfeksııa kezinde, aýdan boıynsha polısııa qyzmetkerlerimen patrýldeý kúsheıtiletinin aıtyp, sondaı-aq turǵyndardy kózdelgen sharalardy saqtaýǵa jáne karantın rejımin ustanýǵa shaqyrdy.