Almaty dárigerleri koronavırýsty emdeý jáne dıagnostıkalaý hattamalaryn túsindirdi

Almaty qalasynyń óńirlik kommýnıkasııalar qyzmetiniń alańynda ótken onlaın-brıfıng barysynda Asfendııarov atyndaǵy Qaz UMÝ ınfeksııalyq jáne tropıkalyq aýrýlar kafedrasynyń professory Ravılıa Egemberdıeva jáne ınfeksıonıst dáriger Tamara Ýtaganova koronavırýsty emdeý jáne dıagnostıkalaý hattamalaryn túsindirdi, sonymen birge, úı karantınin uıymdastyrý, aýrýhanaǵa jatqyzý jáne koronavırýs zardaptaryna baılanysty suraqtarǵa jaýap berdi.

Ravılıa Egemberdıeva vırýs juqtyrǵandarǵa úı karantıninde, ambýlatorlyq jáne reanımasııalyq deńgeıde kútim kórsetý joldary tolyq jazylǵan koronavırýs ınfeksııasyn dıagnostıkalaý jáne emdeýdiń klınıkalyq hattamasy bar ekenin túsindirdi.

Osylaısha, ol koronavırýs ınfeksııasynyń juqtyrǵandardyń ishinde aýrý belgileri joq jáne aýrýy jeńil ótip jatqan naýqastar úı karantıninde jatqanyn atap ótti. Ambýlatorlyq bólimdegi negizgi mindet aýrýdyń aýyr formasynyń aldyn alý bolyp tabylady, al reanımasııalyq bólimde aýrý juqtyrý sońy jaǵymsyz aıaqtalmaýy úshin qarqyndy terapııa júrgiziledi.

Aýrýhanadan shyǵarylǵannan keıin de pasıentter qashyqtyqtan medısınalyq baqylaýda bolady.

Sondaı-aq, Tamara Ýtaganova koronavırýs ınfeksııasynyń aýrý belgileri baıqalmaıtyn formasy týraly kóp qoıylatyn saýaldarǵa jaýap berip, aýrýdyń zardaptary jáne ınfeksııalyq aýrýlardyń jalpy kórsetkishi jaıly aıtty.

Aýrý belgileri baıqalmaıtyn ınfeksııa taratýshylardyń qaýpi nede, sondaı-aq, medısınalyq baqylaý men emdeýdiń qalaı júrgiziletinin túsindirdi.

– Vırýstyń aýrý belgileri joq formasyn juqtyrǵandar qandaı da bir álsizdikti sezinbegenmen, basty qaýip olardyń vırýsty tasymaldaýshy ekendikterinde, ıaǵnı ınfeksııa qozdyrǵyshy bolyp tabylady. Eske salyp ótkim keletini, mundaı naýqastarǵa qandaı da bir em júrgizilmeıdi. Aýrý belgileri baıqalmaıtyn naýqastar, sonymen birge, aýrýy jeńil túrde ótip jatqan azamattar eger úılerinde qart adamdar men sozylmaly aýrýlary bar adamdar bolmasa, úı karantıninde bolýlary kerek. Úıde qalýǵa múmkindikteri bolmasa, karantındik stasıonarlar bar.

Tamara Ýtaganova  azamattardyń  kóbinese aýrýdyń  temperatýra bolmasa, basqa belgilerine nazar aýdarmaıtynyn atap ótti.

– Temperatýra koronavırýs ınfeksııasynyń jalǵyz belgisi emes. Eger sizde basqa da bir aýrý belgileri baıqalsa, jaǵdaıdyń qıyndaýyn kútýdiń qajeti joq. О́zińizdiń jalpy  tájirıbelik dárigerińizben habarlasý kerek, – dedi ol.

Epıdemıologııalyq kezeńde tumaý jáne qyzylsha aýrýlary tirkelgen jaǵdaılar sırek ekenin atap ótti.

– Koronavırýsqa baılanysty engizilgen oqshaýlaný jalpy aýyrý deńgeıiniń tómendeýine sebep bolǵany sózsiz. Tumaýmen aýyrý jaǵdaılary tirkelgenmen, kóbinese koronavırýs ınfeksııasymen sáıkes kelmedi. Sondaı-aq, búgingi tańda qyzylshamen aýyrý oqıǵalary joq.

Dárigerler jeke gıgıena talaptaryn saqtaý aýrýlardyń aldyn alýda qashanda jón is bop sanalatynyn, sondyqtan da ol turǵyndar arasynda ádetke aınalsa, ártúrli ınfeksııalyq aýrýlarǵa shaldyǵý deńgeıin túsirýge ákeler edi dep oı qosty. Olar dál qazirgi ýaqytta qajetti sanıtarlyq-epıdemıologııalyq talaptardy saqtaý men adamdar kóp jınalatyn jerlerge barmaýdyń óte mańyzdy ekenin de atap ótti.

– Kórip turǵandaryńyzdaı koronavırýspen aýyrýdyń saldary óte aýyr bolýy múmkin. Dárigerler pasıentter densaýlyǵy úshin kún saıyn kúres júrgizýde, alaıda turǵyndar óz áreketterine, ásirese qazirgideı aýrýǵa ushyraý birden órshı túsken sátte, jaýapkershilikpen qaraýy kerek. Sondyqtan da biz sizderge qarastyrylyp otyrǵan sharalardy ustanýdyń mańyzdy ekenin eskerte ketkimiz kelip otyr, – dep túıindedi Ravılıa Egemberdıeva.