Jastardy sýısıd jasaýǵa ıtermelep júrgender ustaldy

Túrkistan oblysynda jasóspirimderge arnalǵan sýısıdtik toptyń "kýratory" ustaldy. Ol ınternet arqyly jastardy sýısıd jasaýǵa ıtermelegen. Bul týraly IIM-niń baspasóz qyzmeti habarlady. 

Kámeletke tolmaǵandarǵa qatysty quqyqqa qarsy áreketterdi anyqtaý boıynsha Internet jelisine monıtorıng júrgizý kezinde IIM Krımınaldyq polısııa jáne tergeý qyzmetkerleri kámeletke tolmaǵan qazaqstandyqtardyń qatysýymen óz-ózine qol jumsaý sıpatyndaǵy top týraly aqparat anyqtalǵan.

О́z-ózine qol jumsaýdy nasıhattaý boıynsha oǵan qatysy bar adamdardy anyqtaý jáne ustaý úshin QR IIM kıberqylmysqa qarsy is-qımyl ortalyǵynyń jáne Túrkistan oblysy Polısııa departamentiniń qyzmetkerlerinen arnaıy jedel-tergeý toby qurylǵan.

"Polısııa qyzmetkerleri ári qaraı tekserý jumysyn júrgizý barysynda ınternet jelisindegi uıymdastyrýshynyń jeke-bas derekteri men mekenjaıyn anyqtap ustady. Ol Arys qalasynyń turǵyny bolyp shyqty.

Tintý kezinde kúdiktiden noýtbýk, uıaly telefon, 3 qorap sım-kartasymen jáne basqa da zattaı dáleldemeler alyndy. Telefonnan sýısıdke baǵyttalǵan telegram arnalary tabyldy" delingen aqparattyq habarlamada.

Qazirgi ýaqytta atalǵan jaıt adam óltirýge oqtalý boıynsha tirkelip, sotqa deıingi tergeý amaldary júrgizilýde. Sot sanksııasymen kúdikti qamaýǵa alynǵan.

– Polısııa qyzmetkerleri istiń tolyq mán-jaıyn tekserýde. Sondaı-aq jasóspirimderdi osyndaı ólimge ákeletin oıyndarǵa qatystyrýy múmkin adamdardy jáne arna qatysýshylarynyń ózderin de anyqtaý ústinde, – dep atap ótti IIM Krımınaldyq polısııa departamentiniń bastyǵy Dýman Taev.

IIM ata-analardy balalardyń vırtýaldy ómirine baqylaýdy kúsheıtýge shaqyrady. Jáne shuǵyl qajetti sharalar qabyldanatyn osyǵan uqsas jaıttar oryn alsa, tez arada polısııaǵa habarlaýdy suraıdy.