Brıtanııalyq basylym: Tramp Soltústik Koreıany tolyǵymen joıyp jiberetinin aıtty

Kım Chen Ynnyń qaryndasy Ońtústik Koreıaǵa qarsy áskerı qımyldar josparlap otyrǵanyn aıtsa, Tramp Soltústik Koreıany tolyǵymen joıyp jiberetinin málimdegen. Bul týraly Qamshy tilshisi brıtanııalyq The Express basylymyna silteme jasap habarlaıdy. 

Jaqynda Kım Chen Ynnyń qaryndasy Soltústik Koreıa Seýlge qarsy áreket jasaıtynyn jáne áskerı kúshterine ony júzege asyrýyn tapsyrǵan. 

– Men joǵarǵy basshynyń, bizdiń partııanyń jáne memleketimizdiń ókilettigin qoldana otyryp, qarsylastarǵa kelesi áreketti batyl júrgizýdi tapsyrdym: Jaýǵa qarsy kelesi is-qımyl jasaý quqyǵy bizdiń armııanyń bas shtabyna júkteledi, – dedi Kım Chen Ynnyń qaryndasy.

Onyń buryn-sońdy bolmaǵan agressııasy AQSh-tyń basty odaqtasy Seýldiń alańdaýshylyǵyn týdyrdy.

Basylymnyń jazýynsha, Soltústik jáne Ońtústik Koreıa arasyndaǵy kez kelgen janjal 3-shi dúnıejúzilik soǵysqa ulasady dep boljanýda, óıtkeni Qytaı Kım Chen Ynnyń kommýnıstik memleketine janashyrlyq tanytady, al AQSh kapıtalıstik Ońtústikpen odaq.

Vashıngton men Phenıan baılanysy biraz ýaqyt boıy shıelenisip kelgen. 

AQSh prezıdenti Donald Tramp BUU-nyń bas assambleıasyna joldaǵan alǵashqy úndeýinde Soltústik Koreıany tolyǵymen joıyp jiberetinin aıtqan.

– Bizdiń ǵalamsharymyzdyń qasireti – jalǵan rejımderdiń shaǵyn toby. Eger ádil adamdar zulym adamdarǵa qarsy shyqpasa, onda zulymdyq jeńiske jetedi, – dedi Tramp.

Artynsha ol Soltústik Koreıadaǵy urlaý, qysym kórsetý jáne ıadrolyq synaqtar týraly aıtqan.

– AQSh úlken kúsh pen shydamdylyqqa ıe. Eger ózimizdi nemese odaqtastarymyzdy qorǵaýǵa májbúr bolsaq, bizde Soltústik Koreıany tolyǵymen joıýdan basqa amal qalmaıdy, – dedi AQSh prezıdenti.