Belsendi Ásııa Tólesova 10 táýlikke qamaldy

Sársenbide tergeý soty qoǵam belsendisi Ásııa Tólesovany 10 táýlikke qamady. Belsendi sotynan tikeleı efırdi kúdiktiniń anasy Janar Jandosova júrgizip otyrdy.

Tólesova bılik ókilin qorlady (389-bap), bılik ókiline qatysty kúsh qoldandy (380-bap) dep aıyptalýda.

Sýdıa sot kezinde kúdikti Tólesova jańa quqyqbuzýshylyqqa jol berýi múmkin ekenin málim etti.

Belsendiniń advokaty Álimjan Oralbaı sheshim zańsyz ekenin, tergeý men prokýratýra Tólesovanyń quqyqbuzýshylyqty qaıtalaýy múmkin ekenin rastaıtyn materıaldy kórsetpegenin aıtyp, sheshimge shaǵymdanatynyn jetkizdi.

6 maýsym kúni Almatydaǵy mıtıng kezinde "polısııa qyzmetkerine shabýyl jasady" dep aıyptalyp otyrǵan Ásııa Tólesova jaǵdaıdy bylaı dep túsindirdi.

"Qıylǵan birneshe sekýndtyq vıdeoda meniń janymda turǵan polıseıdiń fýrajkasyn qaǵyp jibergenim kórsetilgen. Men qoǵamǵa esh qaýpi joq, óz pikirin bildirý úshin mıtıngke qarýsyz kelgen azamattarǵa polısııa tarapynan jasalǵan adamgershilik pen zańǵa qaıshy qarym-qatynasty kórip emosııalyq turǵyda osylaı jaýap berippin. Ustalǵandar arasynda mıtıngke kelgen qart adamdar men jastar ǵana emes, jaı ǵana ketip bara jatqandar da boldy. Sondaı jaǵdaıdyń birinde azamattardy avtozakqa kúshtep apara jatqanda biz qury qarap turmaı, oǵan kedergi keltirgimiz keldi. Biraq bizdi polıseıler ıterip, kúsh qoldandy" dep jazǵan belsendi óziniń facebook-taǵy paraqshasynda.