Mınıstrdiń nazaryna: Qandastarymyz QazUÝ-den oqyǵysy keledi

Bilim jáne ǵylym mınıstri Aslan Sárinjipovtiń,

Ál-Farabı atyndaǵy QazUÝ rektory Ǵalymqaıyr Mutanovtyń nazaryna!

14 qyrkúıek ál-Farabı atyndaǵy QazUÝ-de shetelden kelgen qazaq balalaryna arnalǵan daıyndyq fakýltetine qabyldaý emtıhany ótti.

Qazirgi qolda bar málimetterge súıensek, bul synaqqa  250-ge jýyq túlek  qatysqan. Olardyń 30 paıyzy ıaǵnı 80 talapker Túrkistandaǵy Qoja-Ahmet Iаssaýı atyndaǵy qazaq-túrik ýnıversıtetiniń tyńdaýshysy atanbaq. Al qalǵandary Almatyda qalyp, ál-Farabı atyndaǵy QazUÝ-dyń daıyndyq fakýltetine túsýdi qalaıdy.

Esterińizge sala ketsek, qazaq dıasporasyna arnalǵan daıyndyq fakýltetinde bilim alýǵa 2000 jyldardyń basynda jylyna 1500-ge jýyq qandasymyz qujat tapsyratyn edi. Sońǵy jyldary bul kórsetkish kúrt tómendegen. Tipti keı jyldary talapkerler sany 200-ge de tolmaı qaldy.

Bul jaǵdaı týraly joǵary oqý ornyna deıingi bilim berý fakýltetiniń ustazy Jazıra Tumanbaıqyzynan bilýimizshe, ál-Farabı atyndaǵy QazUÝ-den bilim alǵysy keletin túlekterdiń orynyn Prezıdent jarlyǵy boıynsha oqýǵa kelgen Aýǵan stýdentteri basqan. Iаǵnı sońǵy 3 jylda QazUÝ-diń daıyndyq fakýltetine  bólinetin 150 granttyń basym bóligin Aýǵan stýdentteri ıelendi. Sonyń saldarynan elimizdiń bas ýnıverıstetinen oqyǵysy keletin qandastarymyz Almatydan jyraq ketýge májbúr.  

–  Men 2004 jyldan beri Daıyndyq fakýltetinde basshylyq qyzmette jumys jasap kelemin. QazUÝ-ge shetelden kelgen stýdentterdi daıyndaýǵa 150 grant bólinedi. Sońǵy jyldary bul granttardyń kóp bóligin Aýǵanstannan kelgen tyńdaýshylar ıelenýde. Prezıdent jarlyǵy boıynsha olar bizde oqýǵa mindetti. Degenmen  qazaq dıasporasyna bólinetin 150 grant Aýǵan stýdentterinen bólek qarastyrylsa jón bolar edi, - deıdi Jazıra Tumnabaıqyzy Moldaǵalıeva.

Bıyl bul fakýltetten oqýǵa Aýǵanstannan kelgen 174 túlek ótinish bildirgen. Bilim jáne ǵylym mınıstrligi qarastyryp otyǵan 150 grant olardyń ózine de azdyq etip otyr. Al dál osy orynǵa qujat tapsyryp otyrǵan 150-ge jýyq qazaq balasyn qaıda aparamyz? Olardyń ishinde sheteldiń, mysaly, Qytaı eliniń bildeı ýnıversıtetterin tárk etip kelip otyrǵan qanshama talantty balalar bar.

Emtıhan tapsyrýǵa kelgen baýyrlarymyzdan surap bilgenimizde, bireýi Qytaıdyń mańdaı aldy Pekın ýnıverıstetinen bas tartyp, "ál-Farabıden" oqýdy maqsat etip kelgen, bireýi Almatydan basqa qalada eshqandaı týys-týǵany joq. Bul degen sóz oqýǵa talaptanyp kelgen jas qazaqtardyń kóp sandysy Almatyda qalyp, bilim alǵysy keledi. Bylaısha kóp te adam emes. 150 túlekke bir jyldyq oqý grantyn berý asa qıyndyq týdyrmasa kerek.

Al olar  keler jyly qandaı qalada, qandaı ýnıversıtette oqyǵysy keledi. Ony ózi, óziniń bilimi sheshedi. Qazire bir jyldyq oqytý máselesin kúrdelilendirmeı Bilim jáne ǵylym mınıstrili ońtaıly sheshim qabyldaǵany jón.

Bilál Qýanysh