Ilon Mask ǵarysh kemesiniń Qazaqstannan ótkendegi vıdeosy jarııalandy

Ilon Masktyń SpacX kompanııasynyń "Dragon" ǵarysh kemesi Halyqaralyq ǵarysh stansııasyna (HǴS) jetti.

NASA ǵaryshkerleri Dag Herlı men Bob Bennken Florıdadan senbide ushqan bolatyn. 

Tikeleı efırde ǵarysh kemesiniń Kaspıı teńizinen, Qazaqstan terrıtorııasynan, Baıqońyrdyń soltústiginen ótkeni habarlandy.

– Dál qazir "Dragon" mólshermen Kaspıı teńiziniń ústinen ushyp ótip barady. Bulttar jer planetasyna keremet kórinis berip tur... "Dragon" ǵarysh kemesi men Halyqaralyq ǵarysh stansııasy Qazaqstannan ótip bara jatyr. Dál qazir olar Baıqońyrdyń batys jaǵynda birneshe júz mıl qashyqtyqta ketip barady. Baıqońyr keshege deıin bizdiń Qurama Shtattardyń ǵaryshkerleri úshin orbıtaǵa ushyp, Halyqaralyq ǵarysh stansııasyna jetetin jalǵyz qaqpa bolatyn. Olar dál qazir Baıqońyrdyń soltústiginen ótip barady. Biz Qazaqstannyń keremet kórinisin kórip turmyz, – dedi SpaceX-tyń Youtube arnasynyń tikeleı efırinde eki kommentatordyń bireýi. 

– Krıs Kessıdı jaqynda ǵana osy Baıqońyrdan Soıýz zymyrany arqyly ushqan bolatyn, – dedi ekinshisi. 

Ǵarysh kemesi Qazaqstan terrıtorııasynan ótip, mólshermen bir saǵattan artyq ýaqyttan keıin, Halyqaralyq ǵarysh stansııasymen (HǴS) qosyldy. Ol Almaty ýaqyty boıynsha saǵat 20:16-ǵa týra keldi. Bul kestedegi ýaqyttan sál erterek. Qosylý Qytaıdyń soltústigi men Mońǵolııa shekarasy tusynda 422 shaqyrym  bıiktikte boldy. 

Ǵarysh kemesiniń Qazaqstan terrıtorııasynan ótken kezdegi vıdeony tómendegi silteme arqyly kórýge bolady.