• USD 411.66
  • EUR 465.92
  • RUB 5.81
  • CNY 58.79

29 Mamyr, 2020 NEWS

"Pandemııanyń teńizge shyǵatyn joly joq damýshy elderge zardaby kóbirek tıdi"

akorda.kz

Qazaqstan Prezıdenti «COVID-19 pandemııasy tusynda jáne odan keıingi kezeńde damýdy qarjylandyrý» atty joǵary deńgeıde ótken sharaǵa qatysty. Beıne konferensııa formatyndaǵy forým BUU Bas hatshysy Antonıý Gýterrıshtiń, Kanada Premer-Mınıstri Djastın Trıýdo men Iаmaıka Premer-Mınıstri Endrıý Holnesstiń bastamasymen ótti. Atalǵan jıyn COVID-19 indetiniń saldaryn jeńildetý jáne daǵdarystan keıingi qaıta qalpyna keltirý jumystaryna halyqaralyq is-qımyldardy jumyldyrýǵa arnaldy.

Teńizge shyǵatyn joly joq damýshy elder tobynyń tóraǵasy retinde sóz sóılegen Qasym-Jomart Toqaev álemdik qoǵamdastyqtyń nazaryn indettiń saldaryna aýdara otyryp: «Pandemııa barlyq memleketterdiń damýyna qaýip tóndirdi. Ásirese syrtqy qarjylandyrýy, saýda jáne ınvestısııasy azaıǵan teńizge shyǵatyn joly joq damýshy elderge onyń zardaby kóbirek tıdi», – dedi.  

Osy oraıda Memleket basshysy damýshy elderdiń syrtqy qaryzdardy jáne «sıfrlyq teńsizdikti» joıý, taza aýyzsýǵa, jasyl jáne zamanaýı agrotehnologııalarǵa qoljetimdilikti qamtamasyz etý problemalaryn sheshý úshin halyqaralyq is-áreketterdi jumyldyrýǵa shaqyrdy.

Qasym-Jomart Toqaev Qazaqstannyń «BUU-nyń gýmanıtarlyq kómek kórsetýdiń jahandyq josparyn» iske asyrýǵa jáne koronavırýsqa qarsy kúres barysynda birqatar shet memleketke jasaǵan gýmanıtarlyq qoldaýyn erekshe atap ótti. Memleket basshysy elimizdiń jahandyq azyq-túlik qaýipsizdigin qamtamasyz etýge, qaqtyǵystardy retteýge jáne beıbitshilik ornatýǵa beıildi ekenin naqtylady.

Forýmǵa Germanııa, Fransııa, Ońtústik Afrıka Respýblıkasy, Japonııa, Italııa, Ulybrıtanııa, Pákistan, Qyrǵyzstan, Belarýs, Saýd Arabııasy jáne basqa da memleketterdiń kóshbasshylary, Halyqaralyq valıýta qory, Ekonomıkalyq yntymaqtastyq jáne damý uıymy, Dúnıejúzilik bank jetekshileri, sondaı-aq, birqatar halyqaralyq qarjy ınstıtýtynyń basshylary qatysty. 

Qate tapsańyz, qajetti bólikti tańdap ctrl+enter basyńyz.

Pikir qaldyrý

pikir