Blokbekettegi qaıǵyly oqıǵadan keıin úsh shendi qyzmetinen ketti

Ishki ister mınıstrligi 25 mamyrda Almaty oblysyndaǵy blok-bekette  bolǵan qaıǵyly oqıǵanyń sebep-saldaryn anyqtady. Osy oqıǵada eki polısııa qyzmetkeri qaza tapqan bolatyn. Tekseris kezinde jeke quram arasynda aldyn alý jumystaryn júrgizýde olqylyqtar bolǵany anyqtaldy. Tártip buzǵan qyzmetkerlerge qatysty der kezinde tıisti sharalar qoldanylmaǵan.

Sonymen qatar, BAQ-qa aqparatty burmalap usyný faktilerine baǵa berildi. Qyzmettik tekserý qorytyndysy boıynsha Ishki ister mınıstri Erlan Turǵymbaevtyń buıryǵymen basshylyq qyzmette júrgen toǵyz polıseıge qatysty tártiptik jazalaý sharasy qabyldandy.

– Almaty qalasy PD Patrýldik polısııa polki komandıriniń orynbasary polısııa podpolkovnıgi Q.E. Sataev;

– Almaty qalasy PD Kadr saıasaty basqarmasynyń basshysy polısııa polkovnıgi O. S. Myrzabekov;

– Almaty qalasy PD Jeke quram boıynsha ınspeksııa basshysy polısııa podpolkovnıgi A.O. Aqylbekov atqaryp júrgen laýazymdarynan bosatyldy.

– Almaty qalasy PD Jergilikti polısııa qyzmetiniń basshysy polısııa polkovnıgi M. A. Sattarovqa (buryn polk komandıri qyzmetin atqarǵan);

– Almaty qalasy О́zindik qaýipsizdik basqarmasynyń basshysy polısııa podpolkovnıgi S.O. Kókirekbaevqa;

– Almaty qalasy PD basshysynyń orynbasary polısııa polkovnıgi A.A. Nasharbekovke qyzmetine tolyq sáıkes emestigi eskertildi.

– Almaty qalasy PD basshysynyń birinshi orynbasary polısııa polkovnıgi N. S Almasbekovke, Almaty qalasy PD-niń bólim basshysy polısııa podpolkovnıgi S.K. Ázirbekke qatań sógis jarııalandy.

Almaty qalasy Polısııa departamentiniń basshysy Q.D.Taımerdenovke senip tapsyrylǵan bólimsheniń qyzmetin uıymdastyrýdaǵy kemshilikteri úshin qatań sógis jarııalandy.

– Árbir basshy óziniń qaramaǵyndaǵylarǵa jaýapty. Ol jeke quram arasynda tártip pen zańdylyqty saqtaýdy qamtamasyz etedi. Bul jumys Almaty qalasynyń Polısııa departamentinde tıisti deńgeıde uıymdastyrylmaǵan. Nátıjesinde biz birden eki qyzmetkerden aıyrylyp qaldyq, bir qyzmetker aýyr dene jaraqatyn aldy. Bizdiń barlyǵymyz úshin, ásirese, týǵan-týysqandarymyz úshin bul – úlken qaıǵy-qasiret jáne orny tolmas qaza. Sondyqtan bul tótenshe jaǵdaıǵa jol bergen basshylarǵa tıisti sharalar qabyldandy. IIM basshylyǵy aldaǵy ýaqytta da qyzmettik tártipti saqtaýdy qatań talap etip, polısııa qyzmetkerleriniń kez kelgen tártip buzýshylyǵyna prınsıpti baǵa berip, jańa jaǵdaıda jumy istegisi kelmeıtin nemese jumys isteı almaıtyn adamdardan óz qataryn tazalaıtyn bolady, – dep atap ótti Ishki ister mınıstri Erlan Turǵymbaev.

Eske sala ketsek, 25 mamyr kúni tańǵa jýyq № 4 blokposta BMW júrgizýshisi mas kúıinde beton qorshaýǵa soǵylyp baryp, ınersııamen patrýldik polısııa kóligin soqqan. Jol-kólik oqıǵasynan eki polısııa qyzmetkeri kóz jumdy. Taǵy bir polıseıdiń jaǵdaıy aýyr.